Удмурт егитъёслэн «Шунды» мерлыко огазеяськонзы покчи нылпиослы удмурт кылэз дышетонъя «Чингыли» мультимедийной курсэз улонэ пыӵатон ужзэ азьланьтэ. Та дырлы проектлэн нырысетӥ люкетэз – нылпиослы сӥзем чеберлыко произведениосты кылдытонъя ӵошатскон – йылпумъяськи

«Чингыли» проект радын покчи нылпиослы чеберлыко литературной произведениосты гожтонъя конкурс куинь номинациосъя ортчиз: «Удмурт выжыкыл», «Удмурт кылбур» но «Удмурт мадиськонъёс». Вожвылъяськонэ оглом 12 мурт пыриськиз. Пӧлысьтызы тросэз нылпи садъёсын ужась егит воспитательёс.

Конкурсантъёс 17-тӥ куартолэзе “Удмурт дунне” газетлэн «Ингож» литературной студияз люкаськылӥзы.

Таяз радэ литературной школа-студиялэн ужез ӵапак нылпи литературалы сӥземын вал. Егитъёс та темая шаерамы тодмо гожъяськисьёсын – Лия Малыхен, Ульфат Бадтретдиновен, Елена Минигараеваен но Зинаида Рябининаен кенешизы. Ӧнерчиос ужрадэ вуэмъёслэсь материалъёссэс эскеризы, зол но ляб палъёссэ пусйизы, азьланезлы дэмланъёссэс шараязы.

Егит гожъяськисьёсты дунъязы: Лия Малых – «Удмурт дунне» газетысь журналист, выжыкылъёс гожъясь, Ульфат Бадретдинов – «Кизили» журналлэн валтӥсь редакторез но Ижкарысь удмурт кыллы дышетӥсь воспитательёслэн огазеяськонзылэн кивалтӥсез, «Удмурт нылкышно кенеш» огазеяськонлэн ёзчиез Ольга Аркашева.

«Удмурт выжыкыл» номинациын нырысетӥ интыен пусъемын «Инвожо» журналысь корреспондент Наталья Варламова, кыкетӥ – Глазов ёросысь Пусошур гуртысь дышетӥсь Валентина Васильева, 3-тӥ инты Италиын улӥсь егит удмурт тодосчи Лариса Широбокова басьтӥз.

«Удмурт кылбуръёс» номинациын тужгес но устоосыз луизы: егит кылбурчи Марина Пахомова, Кузебай Герд нимо нылпи садысь воспитатель Ирина Пантелеева но Удмурт кун университетын дышетскись егит кылбурныл Татьяна Баталева.

Жаляса верано, «Мадиськонъёс» номинация трос ужъёс келямын ӧй вал, солы луыса пӧлысьтызы одӥгез тужгес устоез но аспӧртэмез гожъяськись быръемын вал. Вормисе потӥз Йӧскалык театрысь егит артист Алексей Котков.

Ӧнерчиос пусйизы: «Та нуналлы нылпиослы гожъясь егит писательёс пӧлысь тросэз покчи нылпиослэсь психологизэ умой уг валало. Солы луыса уноезлэн ужъёссы школаын дышетскись пиналъёс понна тупасьгес гожтэмын вал».

Азьланяз егитъёслы текстъёссы бордын ужаны дэмламын на вал. Берло соос «Чингыли» покчи нылпиослы удмурт кылэз дышетонъя мультимедийной курслэн ог люкетэз луозы. Быръем произведениос аудио но печатной форматэн “Чингыли» диск вылэ интыяськозы.

Видеоматериалэн, шудонъёсын но покчиослы чеберлыко произведениосын диск 2016-тӥ арлэн пумаз, толсур толэзе потоз.

Проект радъяське элькунысьтымы Наукая но тодон-валан сётонъя министерстволэн юрттэмез улсын.

Ивор кутэмын татысь: https://vk.com/shundy