9-тӥ толсуре Калыкъёслэн Эшъяськон юртазы мерлыко огазеяськонъёслэн ёзчиоссы визьзэс сыназы «Что? Где? Когда?» шудонын. Ужрадэз куатетӥ арзэ ини Удмурт Элькунысь азербайджанъёслэн «Достлуг» мерлыко огазеяськонзы Йӧскалык политикая министерстволэн юрттэмез улсын ортчытэ.

Шудонэз учкыны вуизы нимысьтыз ӧтем куноос: Ижкарлэн Тӧроез Ю.Тюрин, йӧскалык полтикая министрлэн воштӥсез Л.Соковикова, Ижкарысь мер палаталэн Тӧроез Л.Гуляшинова, кунпуш ужъёсъя министерствоысь кӧчылон сярысь юанъёсъя кивалтоннилэн кивалтӥсез К.Дубровин, Быдэс Россиысь Азербайджанъёслэн конгрессылэн Нижний Новгородысь улосвыл ёзэтэзлэн директорез Р.Агаев.

Куноос ӟечкылан-сӥзёнъёс сяна, котькудзы пусйизы азербайджан мерлыко огазеяськонлэсь элькунамы тупаса улон удысын бадӟым уж нуэмзэ, верамын вал макем кулэлыко мерлыко ӵектосъёс быдэсто соос. Ваньзэс шумпоттӥз эшлыко атмосфера, угось татын пӧртэм выжыысь калыкъёс ог-огенызы верасько, кенешо, ог-огзы понна шумпото. Оло соин но та шудонэз арлы быдэ ӵыдытэк витё командаос.

Шудонэз нуиз «Что? Где? Когда?» элитарной клублэн ёзчиез, 2004-тӥ арын шудонлэн дунне чемпионэз, «Хрустальная сова» кубоклэн кузёез Дмитрий Авдеенко. Пыриськизы ужрадэ 19 командаос, котькудаз 6 адями. Нырысетӥ этапын быръемын вал тужгес но зол 6 командаос. Кыкетӥ эпатын таос «Брейн-ринг» шудонэн шудӥзы ини.

Озьыен 2016-тӥ арын турнирлэн вормисез луиз Удмуртиысь бигер егитъёслэн огазеяськонзылэн «Татарлар» командазы, 2-тӥ инты утӥз Чепецкой механической заводлэн «Мудрый атом» командаез, нош 3-тӥ интыын Сарапулысь электрогенераторной заводлэн «Просто Ять» командаез.

Вормисьёс басьтзы кубокъёс, шудонэ пыриськем котькуд команда пусъемын вал дипломен.