20-тӥ куартолэзе Калыкъёслэн эшъяськон юртазы Финн-угор клыклэн лулчеберетэзлы сӥзем «Џыжы-выжы-выжыкыл» нылпи фестивальлэн финалэз ортчиз.

Ужрадлэн валтӥсь меретэз – ӵыжы-выжы луись финн-угор калыкъёслэн лулчеберетэнызы тодматскон но сое вӧлмытон, удмурт кыллэсь кутӥськемзэ паськытатон, семьяын удмурт кылын вераськонэз азинтон.

Фестивалез ортчытӥзы Удмурт нылкышно кенеш, Калыкъёслэн эшъяськон юртсы. Юрттэт сётӥзы Удмурт Элькунысь йӧскалык политикая министерство но Вань удмуртъёслэн «Удмурт кенеш» огазеяськонзы.

Фестивале пыриськисьёслы ӟеч мылкыд но вормонъёс сӥзизы Удмурт Элькунысь йӧскалык полиикая министрлэн воштӥсез П.А. Орлов, Удмурт Элькунысь тодосъя но дышетонъя министерствоысь ӧнерчи Н.П. Ямаева, Вань удмуртъёслэн «Удмурт кенеш» огазеяськонзылэн кивалтӥсез И.Н. Семенов, Удмурт нылкышно кенешлэн кивалтӥсез Н.А. Степанова.

Фестивале туэ 50 семья пыриськиз. Котькудзы соос, шӧдске, рос-прос дасяськиллям. Сцена вылын соос кырӟазы но, финн-угор калыкъёслэсь выжыкылъёссэс но пуктӥзы, йӧскалык сиён-юон пӧраны быгатэмзэс но возьматӥзы.

Фроловъёслэн семьязы асьсэлы нимысьтыз дӥсь малпам, кудӥз возьматэ соослэсь ӵыжы-выжызылэсь историзэ. Возняковъёслэн но Мензариповъёслэн семьязы «Сабырлыко семья» нимен пусъемын вал. Вормисе потӥзы но «Удмуртлыко семья» ним басьтӥзы Поповъёслэн, Ажимовъёслэн, Шальновъёслэн но Георгиевъёслэн семьязы.

Ортчем фестиваль возьматӥз таӵе ужрад туала семьяослы туж но туж кулэ шуыса. Со юрттэ нылпиослы удмурт кыллэз яратон но гажан мылкыд пыӵаыны, ӵыжы-выжы луись финн-угор калыкъёсын тодматыны.