Калыкъёслэн Эшъяськон юртазы йӧскалык-лулчеберетъя огазеяськонъёс пӧлын Дартс шудонъя элькун ӵошатскон ортчытэмын вал. Ужрадэз Россиысь калыкъёслэн огъя луонзылэн арезлы сӥзизы. Ӵошатсконэ 150-лэсь трос пӧртэм аресъем адями люкаськиз. Соос 23 командае огазеяськизы, соос пӧлын УЭ-ысь йӧскалык-лулчеберетъя огазеяськонъёс, вылӥ дышетсконниосысь ӧнерчиос.

Люкаськемъёсты ӟечкылаз Кун Думаысь депутат Олег Гарин.

Калыкъёс куспын спартакиада улсын ар ӵоже пӧртэм спортъя ӵошатсконъёс ортчыло. Туэ пыриськисьёс шахматэн но футзалэн шудӥзы ини. Азьланяз тунсыко программа вите: фиджитал-футбол, компьютер спортъя ӵошатсконъёс, ӝӧквыл теннис, бильярд, кузь нардыос, боулинг, волейбол, бигер йӧскалык шудонъёс но канатэз кыскон.

Вожвылъяськонъёс кык люкетлэсь ортчизы: котькуд муртлэн зачётэз но «301 очко» шудон. Командаос йӧскалык-лулчеберетъя огазеяськонъёсысь вуизы, котькудаз – 3 шудӥсь.

Воргоронъёс пӧлын дартс шудонъя Сергей Зинков вормиз, Акбер Салимов но Дмитрий Дмитрошкин призёръёс. Нылкышноос пӧлын Римма Лагунова вормиз, нош Светлана Агеева но Надежда Широбокова кыкетӥ но куинетӥ инты утӥзы.

Командаос вӧлын  «Умельцы-1» вормизы, кыкетӥ инты «Иман» командалэн, нош куинетӥ – Удмурт кун университетысь ветеранъёслэн огазеяськонзы.

Вормисьёсты кубокъёсын, медальёсын но дипломъёсын данъетазы.

«Дартс шудонъя элькун ӵошатсконэз ми нырысетӥзэ ортчытӥськомы. Асьмелэн азьмугмы – калык кусыпъёсты, дунлыкъёсты эшшо но юнгес умоятыны но вӧлмытыны. Татын зэмос эшъяськон но ог-огдэ гажан вордӥське, соиз, мар понна асьмеос элькунамы калык кусыпъёсты азинтӥськомы. Таӵе спорт кичӧлтонъёс юртто асьмелы огкылысь улыны, элькунмылэсь кужымзэ адӟытӥськомы», – вераз йӧскалык политикая министр Эдуард Петров.

Ужрадэз ортчыто УЭ-ысь Йӧскалык политикая министерство, Калыкъёслэн Эшъяськон юртсы, Удмуртиысь бигер мерлык центр, «Янарыш» ивортодэтъя центр, 5-тӥ номеро олимпи резерв дасянъя спорт школа.