Котькуд ар УЭ-ысь йӧскалык политикая министерство ёросъёсын «Миннацлэн нуналэз» ужрад ортчытъя. Туннэ министерствоысь ужасьёс но министр Эдуард Петров Дэбесысь улосчиосын пумиськизы.

«Ужрадэз ортчытон улсын, ми улосчиосты министерстволэн уженыз, Кун йӧскалык политикалэн Стратегиезлэн ужпумъёсыныз тодматӥськомы. Дышетон семинаръёс, тематической но проектной секциос ортчытӥськомы, улосчиосын пумиськиськомы. Со сяна, дышетӥсьёсты, завучъёсты, анай-атайёсты терроризмен но экстремизмен нюръяськонъя ивортодэтэн тодматӥськомы», – пусйиз министр.

Дэбес ёросын пумиськон пайдаё ортчиз.

Пыриськисьёслы ӟечкылан кылъёсын вазиськиз Дэбес ёрослэн Тӧроез Андрей Иванов. Докладаз мерлык, экономика, политика, йӧскалык удысъёсысь азинсконъёсын но йылпумъянъёсын тодматӥз.

Йӧскалык политикая министр Эдуард Петров Министерстволэн ужез, вуоно ар понна валтӥсь ужпумъёсыз но азьмугъёсыз сярысь вераз. Пусйиз, Дэбес ёросын трос тунсыко ӵектосъёс радъясько: «Байгурезь: к вершинам возможностей», «Сибирский тракт: вчера, сегодня, завтра», «От крезя до RAVVASTa» онлайн-кружок, «Сторона родная» шаертодонъя тодэтъёсын нимысьтыз ресурс но «Досуговый центр для людей с ОВЗ «Пере-Печь».

Со сяна, министр синйылтӥз: Дэбесын улӥсьёс бадӟым саклык висъяло калыкъёслэсь кылъёссэс, лулчеберетссэс, ӟеч кусыпъёссэс утён но азинтон удысъёсын.

Коммерциен герӟаськымтэ огазеяськонъёсысь огмуртъёслы, лулчеберет, дышетон, егитъёсын ужан политика удысъёсысь ёзчиослы ӵектосъёсъя семинар ортчытэмын. Секциез нуиз Лариса Князева, Калыкъёслэн эшъяськон юртысьтызы ужась. Ёросын та ӧнеръя бадӟым уж нуиське. Кылсярысь, 2022-тӥ аре «Сибирский тракт» лулчберетъя но туризмъя ивортодэто-методической центрлэн, ёрос улонтӥкуспо лыдӟетъюртлэн, «Всероссийское общество инвалидов» огазеяськонлэн проектъёссы Президентлэн фондысьтыз грант утӥзы. Со сяна, Дэбес ёрос йӧскалык политикая вожвылъяськонъёсы мылысь-кыдысь пыриське. Озьы, кылсярысь, 2022-тӥ арын «Мобильное приложение «WORDSкон» ӵектоссы вормисе потӥз но 2023-тӥ арын со улонэ пыӵатэмын луоз.

Дышетон ужъюртъёсысь ӧнерчиослы «Колумбайн. Опасное деструктивное явление» докладэныз тодматӥз Удмурт Элькунысь Тӧролэн но Кивалтэтлэн Администрациезлэн терроризмлы пумит ужез радъянъя ёзэтлэн кивалтӥсез Олег Кузнецов но солэн воштӥсез Ольга Меркушева.

УЭ-ысь йӧскалык политикая министрлэн воштӥсез Людмила Соковикова сэрттӥз-пертчиз муниципал кылдытэтъёсысь этносоциальной югдуръёсъя юанъёсты, соин ӵош ужаз Светлана Хохрякова – муниципал кылдытэтысь аппаратлэн, администрациысь депутатъёслэн Советсылэн кивалтӥсез.

Озьы ик, Министр кунмуртъёсын нимысьтыз пумиськон ортчытӥз. Эдуард Степанович улӥсьёсын вераськиз но сюлмаськытӥсь юанъёслы валэктон сётӥз.

Ужрад киын лэсьтэм арбериосты адӟытонэн йылпумъяськиз, радъяз сое ёросысь киужъёсъя юртлэн директорез Елена Бушмакина.

«Тау кылъёс вераме потэ командаелы но тӥледлы, гажано улосчиос, ужрадэ мылысь-кыдысь пыриськемды, трос калыкъем Удмуртиын эшъяськонлэсь кулэлыксэ валамды понна», – йылпумъяз Эдуард Петров

Вуоно «Миннацлэн нуналэз» ужрад куартолэзе Балезино ёросын ортчоз.