2-тӥ южтолэзе азербайджанъёслэн «Достлуг» мерлыко огазеяськонзылэн ёзчиосыз 2016-тӥ арлы йылпумъянъёс лэсьтон понна Калыкъёслэн Эшъяськон юртазы люкаськылӥзы.

Пумиськонэ озьы ик пыриськизы Удмурт Элькунысь йӧскалык политикая министрлэн нырысетӥ воштӥсез Павел Орлов, Кунпуш ужпумъёсъя министерствоысь миграци юанъёсъя кивалтоннилэн кивалтӥсез Константин Дубровин, егитъёслэн «Одлар-Юлду» огазеяськонзылэн ёзчиосыз.

«Достлуг» огазеяськонлэн кивалтӥсез Зульфигар Мирзаев 2016-тӥ арлы йылпумъянъёс лэсьтӥз. Кивалтӥсьлэн пусъемезъя, огазеяськонлэн ёзэтъёсыз Сарапул но Вотка каръёсын, Шаркан, Кез, Балезино, Эгра, Дэбес, Якшур-Бӧдья, Вавож но Каракулино ёросъёсын ужало. 2016-тӥ арын Пичи Пургаысь но азербайджанъёс огазеяськон кылдытӥзы.

Кылем арын огазеяськон 70-лэсь ятыр ужрадъёс ортчытӥз. Ваньмыз соос калык кусыпъёсты радъянлы сӥземын. 2016-тӥ арын толшор толэзе азербайджан кылъя Байрам Гумбатов нимо арнянунал школа ужаны кутскиз, нош тулыспал толэзе ӧсъёссэ усьтӥз азербайджан эктонъёсъя школа. Ар ӵоже огазеяськонъёслэн ёзчиоссы мыло-кыдо пыриськылӥзы пӧртэм пумо ужрадъёсы, вожвылъяськонъёсы.

Вараны кулэ на, «Достлуг» озазеяськон бадӟым саклык висъя пересьёслы, анай-атайтэм кылем нылпиослы, сӧсыръёслы юрттэт сётонлы. «2017-тӥ арын но ужмес азинтомы, милям малпанмыя, та ужмылэн туж кулэлыко ӧрыз луэ», – пусйиз Зульфигар Рагимович.

Озьы ик пумиськонын огазеяськонлэсь ёзчиоссэ данъянъёсын но туакаронъёсын пусйизы.