Эстониысь ӵыжы-выжы луись калыкъёсты азинтонъя программа егит удмурт поэтессаез, журналистэз, «Узы-боры» кинолэсь сценаристсэ но режиссерзэ Дари Лелиез «Древо мира» премиен пусйиз.

Дарали Лели (Елена Петрова) вордӥськиз но будӥз Ижкарын. Удмурт кун университетысь кылосбуръя факультетэз йылпумъяз, 2009-2010 чеберлыко берыктонъя Будапештын стажировка ортчиз. Удмуртие берытскемез бере ассэ эскериз пӧртэм удысъёсын. Аслаз эшъёсыныз ӵош егитъёслы нырысетӥ кино «Узы-боры» лэсьтон борды басьтӥськиз. 2014-тӥ арын вылез кинолэн, «Пузкарлэн», премьераез ортчиз. Таизлэн но сценаристэз Дарали Лели.

Трос аръёс ӵоже Дарали Лели литература удысын тырше, кылбур гожъя, удмурт кылэ берыктэ мукет кылъёсысь произведениосты, егитъёслы потӥсь «Dаrt» газетлэн редакторез луыса ужа. Блог бордын ужам понназ 2011-тӥ арын «Зарни вотэс» премиен пусъемын.

2012-тӥ арын модая «Mademoiselle Oudmourte» агентство усьтӥз. Озьы ик радъяз йӧскалык вузъёсты вузан магазин, йöскалык модая «Эль ныл» фестиваль радъян бордын ужаз.

«Древо мира» премиез туэ витетӥ ползэ сёто ини. Премиен пусйиське финн-угор выжыысь адями, кудӥзлэн ужъёсыз сӥземын калыкезлэсь лулчеберетсэ азинтонлы но солэсь асваланзэ ӝутонлы. Премилэн быдӟалаез 2500 евро. Вераны кулэ, та премиез 3-тӥ арзэ удмуртъёс басьто ини. 2012-тӥ арын сое басьтӥз Ува ёросысь экологиея дышетӥсь Ольга Варняева, 2013-тӥ арын – Якшур-Бӧдяысь Татьяна Селиверстова.