15-тӥ куарусёнэ Калыкъёслэн Эшъяськон юртазы удмурт егитъёслэн «Шунды» мерлыко огазеяськонзылэн XIV Йылпумъян-быръён конференциез ортчоз.

«Шунды» мерлыко огазеяськон уно аръёс ӵоже бордаз люка шаплы но быгатӥсь егитъёсты. Огазеяськон быгатӥз утьыны но азинтыны бренд луись ӵектосъёсты но программаосты (соос пӧлын быгатӥсь нылпиос понна «Шундыкар» лагерь, егит азьветлӥсьёслы «Вамыш» лагерь смена), кылдытыны но улонэ пыӵатыны выль проектъёсты («Куарагур» крезьгуръя элькун вожвылъяськон, «АРТ-экспедиция», «Шудком» удмурт кылын визьсынан шудонъёс).

Конференциын егитъёс 2014-2016-тӥ аръёс понна йылпумъянъёс лэсьтозы, азьпалан быдэстоно ужпумъёсты чаклалозы. Ужалозы 4 секциос, кудъёсаз егитъёс ёросъёсысь но улосвылъёсысь ёзъёслэсь шуг-секытъёссэс сэрттозы-пертчозы, тодматскозы удмурт нылпиослэн «Шундысиос» движениенызы, эскерозы ивор вӧлмытӥсь ёзъёсты быгатыса но пайдалыко уже кутонэз, «Шунды» огазеяськонлэсь проектъёссэ азинтон сярысь кенешозы. Делегатъёс выль кивалтӥсь но правление быръёзы.

Ужрадэз ортчытӥсьёслэн ивортэмзыя, конференцие «Шундылэн» 19 ёрос ёзэтысьтыз делегатъёс, Татарстанысь, Башкортостанысь но Комиысь егитъёс, финн-угор егитъёслэн мерлыко огазеяськонъёссылэн азьветлӥсьёссы пыриськозы.

Ватсаса ивортодэт басьтыны луоз таӵе телефонъя: 63-10-44 (Тронина Ольга Алексеевна – «Шунды» мерлыко огазеяськонлэн кивалтӥсез).