2023-тӥ арлэн 16-тӥ коньывуоноысеныз 22-тӥ коньывуонозяз «Дышетскисьёслы лулчеберет» («Культура для школьников») удысэто кусыпъёс вискын лулчеберет-дышетонъя ӵектос улсын ортчоз «Дышетӥсьёслы сӥзён» быдэс Росииысь акция, кудӥз дышетӥсьлэн но наставниклэн Арезлы учыратэмын.

Россиысь Президентлэн Владимир Путинлэн Косэтэныз – 2023-тӥ ар дышетӥсьлэн но наставниклэн Арез шуыса ялэмын. Арлэн азьмугез – дышетӥсьёслэсь, озьы ик визьнодан ужен герӟаськемъёслэсь инлыксэс вылэгес ӝутон.

Акциез ортчытон понна асьме кунысь вань школаын дышетскисьёслы дэмлаське дышетӥсенызы ӵош видеоролик гожтыны, кудаз яратоно кылбурзэс вераны кулэ луоз. Нош нылпи крезьгуръя школаосысь но мукет ватсаса тодон-валан сётонъя ужъюртъёсысь пиналъёслы – дышетӥсенызы ӵош видеоролик лэсьтыны, кудаз соос крезьгур инструментъёсын шудозы яке кырӟалозы. Быдэстэм ужзэс поттоно «Вконтакте» вотэс баме #учителькдш хештегэн.

Озьы ик акцие пыриськозы Россиысь лулчеберетъя но устолыкъя тодмо адямиос, соос вералозы асьсэ дышетӥсьёссы но наставникъёсы сярысь, кудъёсыз со дано адямиослэн творческой улоназы бадӟым пытьы кельтӥзы.

Акция йылпумъяськем бӧрсьы, вань ужъёс пӧлысь жюрилэн ёзчиосыз быръёзы 30 кылбурето но 30 крезьгуро тужгес но тунсыкооссэ ужъёсты. Вормисьёс сертификатъёс но кузьымъёс басьтозы «Дышетскисьёслы лулчеберет» проектэз радъясьёслэсь, нош тужгес но ӟечъёсыз ужъёс пырозы огъя видеоролике но «Культурадляшкольников.РФ» порталын поттэмын луозы.