1-тӥ куарусёнэ йӧскалык политикая министр Эдуард Петров Тодон-валан нуналэн но кык бадӟым юртэз усьтонэн ӟечкылаз Башкортостанысь Выльгурт черкогуртысь улӥсьёсты.

Тодон-валан нуналэ удмурт кылэз мур дышетонэн полилингвальной школаез но Башкортостанысь тужгес но бадӟымзэ удмуртъёслэсь историяя но лулчеберетъя центрзэс сӥё-дано усьтӥзы. Татын – выль технологиос но сям-йылолъёс огинын. Центрлэсь пушсэ удмурт пужыосын чеберъязы.

Удмуртиысь делегация пӧртэм ужрадъёс ортчытӥз но площадкаос дасяз: асьме кибашлыос мылкыд карисьёсты куиськыны, куролэсь арбериос лэсьтыны дышетӥзы, со сяна пиналъёс понна блогингъя мастер-класс ортчиз, кудаз трос дауръем лулчеберет сярысь туала кылын вераны валэктӥзы. Нош котырес ӝӧк сьӧрын «Удмурт нылкышно кенеш» огазеяськонэ пыриськись ӧнерчиос лулчеберетэз утён амалъёс сярысь эскеризы. Ижкарысь Калыкъёслэн Эшъяськон юртысьтызы ӧнерчиос ӵектосъёсынызы тодматӥзы но вуоноезлы эсэпланъёс кылдытӥзы.

Ужрад X Улоскуспо удмурт калыккылос дэменлыкъёслэн «Дуно марӟанъёс» фестиваль-вожвылъяськонэнызы йылпумъяськиз. Ӵектос йӧскалык лулчеберетэз утёнлы, эскеронлы но вӧлмытонлы, Башкортостанысь удмуртъёслэсь сям-йылолъёссэс улӟытонлы но азинтонлы сӥземын.