Удмурт калыклэн лулчеберетэзлы но кылызлы сӥзем ужрадъёсты бускель шаеръёсын ортчытон азьланьтӥське. Туннэ таӵе ужрад Татартсанысь Балтаси ёросысь Лӧзя черкогуртын радъяськиз.

Мыло-кыдо уже пыриськизы пиналъёс, дышетӥсьёс, лулчеберет юртысь ӧнерчиос, йӧскалык-лулчеберетъя огазеяськонъёсысь мылкыд карисьёс.

Пленарной кенешонын, кудӥныз кутскиз ужрад, вань лыктэмъёсты ӟечкылазы элькун но ёрос Администрациысь огмуртъёс.

Аслаз вазиськоназ Людмила Рыбакова, Татарстан Элькунысь дышетонъя, лулчеберетъя, тодосъя но йӧскалык юанъёсъя Кун Кенеш Комитетлэн председателезлэн воштӥсез, нимысьтыз пусйиз, адямиос семьяязы вордскем кылын вераськыны кулэ шуыса. Людмила Николаевна вераз: «Ачид бордысен кутсконо, ӵыжы-выжыосын, семьяын вордскем кылын вераськылоно. Ваньмыз милям киосамы, асьмеос вордскем кылынымы вераськимы ке, калыкмы но уз быры!»

Озьы ик йӧскалык политикая министерстволэн уженыз но асьме элькунмылэн кысык но асдыръем ӵектосъёсыныз тодматӥз министр Эдуард Петров. Эдуард Степанович пусйиз: «Элькунмылэн данъяськонэз – со трос йӧскалыкъем луэмез. Удмуртъёс – шаерлэн одӥгез валтӥсь калыкез. Шумпотымон, мукет интыосын улыса но соос уг вунэто асьсэлэсь сям-йылолъёссэс, кылсярысь, Татартсанысь удмуртъёс».

Вань пыриськисьёс понна Удмуртиысь лыктэм ӧнерчиос секциос радъязы, отын тодматӥзы ужазы кутӥськись выль амалъёсын.

Кукмор ёросысь Улынгурт школаысь директор Семёнов Виталий таӵе ужрадъёсты радъянлы шумпотэ. Со вера: «Нимысьтыз секциос туж пайдалыко ортчизы. Шумпотымон вал Удмурт шаерысь тодмо адямиосын адӟиськыны, выль ужъёсынызы тодматскыны. Оскисько, ёросысь дышетӥсьёсмылы, ӧнерчиосмылы озьы ик тунсыко вал, табере выль тодонъёссэс соос ужазы кутыны быгатозы. Выль тодон-валанъёс – выль луонлыкъёс сёто!»

Нылпиос понна удмурт егитъёслэн «Шунды» огазеяськонзы «Шудком» визьсынан-шудонэз радъяз.

Ужрад шулдыр концертэн йыпумъяськиз. Сцена вылын асьсэды Калык эктонъя «Чебеляй» студия но Балтаси ёросысь коллективъёс возьматӥзы.