Калыкъёслэн Эшъяськон юртсылэн холлаз туспуктэмъёсын кык адӟытонъёс усьтэмын вал. «СВОИ» нимо туспуктэм адӟытонэз Россиысь калыкъёслэн юртсы дасяз. Быдӟым Атыкай ожгар аръёсысь йӧскалык эшъяськонлэн паймымон но зэмлыко учыръёсыз возьматэмын – нылпиослэн, нунокъёслэн асьсэ атайёссы, песяйёссы но соослэн батырлыксы сярысь мадёнъёс дасямын. «Герои и подвиги» нимо кыкетӥез туспуктэм адӟытон Удмурт Элькунысь Россия ожгар-истори огазеяськонлэн ёзэныз ӵош Россиысь Кун Думаысь депутатлэн Лариса Бурановалэн юрттэмезъя дасямын. Стендъёсын туспуктэмъёс, данъян (наградной) ужкагазъёслэн копиоссы но Удмуртиысь пӧртэм дыре ожмаськыны ветлэмъёслэн тодэ ваёнъёссы интыямын. Та адӟытон нимысьтыз ожгар операцие пыриськисьёслы но сӥземын.

Адӟытонъёсты йӧскалык политикая министр Эдуард Петров усьтӥз: «Туннэ ми огшоры туспуктэм адӟытонъёсты ум усьтӥське – со асьме странаысь историлэн аспӧртэм синучконэз, отын азьвыл улӥсьёслэн данлыко вакытъёсты, вормонъёсты возьматэмын. Огъя кунмылы но огъя Вормонмылы сӥзем пӧртэм йӧскалык адямиослэн подвигъёссы мылкыдмес ӝуто, умойгес но кужмогес луыны дышето. Асьмелы котьку тодэ но буре вайыса улоно соосты, кудъёсыз асьсэ улонзэс Вордскем шаермы понна сётӥзы, ӵыжы-выжыосмес кышкытлыклэсь утизы. Озьы ик та историосты мукет поколениослы пыӵатыны кулэ, мед соос ас пельпум вылазы Россилэн вуоноез пумысен кылкутон басьтозы шуыса. Та адӟытонъёсын ми быгатӥськомы, ортчемзэ сяна, ализэ но шӧдыны – улон лэсьтӥськонын асьмелэн интымы сярысь, асьме кунмылэн дунлыкъёсыз сярысь, ас калыктэ но шаердэ яратон мылкыд сярысь. Котькудмы асьмеос Россиез азинтон но ӝутон удысын бадӟым уж лэсьтыны быгатӥськомы».

Ужрадэ пыриськизы ожмаськон пыр ортчем ветеранъёс, нимысьтыз ожгар операцие пыриськисьёс но соослэн семьяоссы, озьы ик Ижкар дышетсконниосысь нылпиос но студентъёс.