«Егитъёслэн йӧскалыккуспо «Вместе» дышетон центрзы» – тазьы нимаське Удмурт Элькунысь егитъёслэн мерлыко огазеяськонъёссылэн «Вместе» ассоциацизылэн но Калыкъёслэн эшъяськон юртсылэн ӵектоссы.

17-18-тӥ шуркынмонэ Удмуртиын дышетон центрлэн нырысетӥ сессиез ортчиз. Татчы Пермь но Оренбург улосъёсысь, Татарстанысь, Башкортостанысь, Марий Эл, Чуваш но Удмурт Элькунъёсысь егитъёс дышетскыны вуылӥзы.

Форумез усьтыны но егитъёсты ӟечкыланы ветлӥзы Удмурт Элькун Тӧролэн но Кивалтэтлэн Администрацизылэн кивалтӥсез Андрей Иванович Гальцин, Удмурт Элькунысь йӧскалык политикая министр Лариса Николаевна Буранова, Калыкъёслэн Эшъяськон юртсылэн кивалтӥсез Татьяна Павловна Боталова.

Нырысетӥ нуналэ егитъёс «Механизм формирования общероссийской гражданской идентичности» темая нимаз группаосын ужазы. Группаослы ӵектосъёс бордын ужаны юрттӥзы модераторъёс – Владимир Никишин, “Всероссийский межнациональный союз молодёжи” мерлыко огазеяськонлэн кивалтӥсезлэн воштӥсез, Арсен Кайгермазов, «Молодёжная ассамблея единый Кавказ мерлыко огазеяськонлэн ивортодэтъя кивалтӥсез. Нош ӝытазе егитъёс «ЭТНОэксперт» шудонын визьзэс сыназы, кытын ӟеч тодон-валанъёссэс возьматӥзы.

Кыкетӥ нуналэ азьветлӥсьёс пумиськизы Удмурт Элькунысь йӧскалык политикая министрен Л.Н.Бурановаен. Лариса Николаевна этнокультуралы сӥзем ӵектосъёсты кылдытонлэн но быдэстонлэн аспӧртэмлыкъёссы сярысь мадиз. Азьланяз министр проектъёсты кылдытонъя нимысьтыз семинаръёс радъяны ӵектӥз.

Бӧрысь егитъёс ӵектосъёсты ивортодэт ласянь азьланьтон, калык лулчеберетлы сӥзем ӵектосъёсты быдэстыны ванёсъёс утчан, мерлыко вотэс бамъёс, ӵектосъёсты быдэстонын SMM технологиосты кутон темаослы сӥзем мастер-классъёсы пыриськизы.

«Пӧртэм выжыысь калыкъёслы Россиын улӥсь огъя йӧскалык шӧдонэз пыӵатон – туннэ нуналлы тужгес но кулэлыко ужпум. Талы мерлыко огазеяськонъёслэсь азьветлӥсьёссэс дышетоно, кенеш сётоно. Мон туж шумпотӥсько татысь ӟырдыт мылкыдо, ужзы понна сюлэмзы висись, калыкъёслэсь кылзэс но лулчеберетсэс азинтонэн тунсыкъяськись егитъёсты пумитамелы. Шумпотымон мукетыз но – егитъёслы кичӧлтонъёссэс улонэ пыӵатыны юртто тӧрлык ёзэсъёс. Тазьы ӵошен ужаса огъя Росси йӧскалык шӧдонэз пыӵатон ужпум быдэстымон луоз», – пусйиз одӥгез эксперт – Арсен Кайгермазов.

Нырысетӥ сессие пыриськемъёслы сертификат сётӥзы. «Вместе» дышетон центрлэсь кыкетӥзэ форумзэ тулыс ортчыты чакламын.