4-10 толсуре Удмуртиын Егитъёслэн нырысетӥ финн-угор экспедицизы ужаз. Отчы пыриськисьёс удмуртъёслэн но мукет калыкъёслэн улон-вылонэнызы, йылолъёсынызы но лулчеберетэнызы тодматскизы. Соос понна этнокультурая 30-лэсь трос ужрадъёс радъямын вал, ивортэ Россиысь егитъёсын ужанъя федерал агентстволэн пресс-службаез. Арня ӵоже егитъёс 25 сюрс квадрат метрлэсь ятыр интывылэз эскеризы, финн-угор выжыысь калыкъёсын 20-лэсь трос пумиськонъёсы пыриськизы, 18 этапной пунктъёсты ортчытӥзы. Экспедицие пыриськисьёс пусйизы, басьтэм тодонлыкъёс тодосъя ужъёссылы инъет луозы шуыса. “Милям экспедицимы Удмуртиен тодматскон ласянь гинэ пусйымон ӧвӧл, озьы ик егитъёслэн огазеяськонъёсынызы кусыпъёсты юнматон но улосвыллэсь туризмъя луонлыкъёссэ азинтон понна валче ужан ласянь но. Ми Россиысь одӥгеныз тужгес тунсыко калыкен тодматскимы но асьме кунмы огазьын луыны кулэ шуыса валанлы эшшо матэгес луимы”. (Альбина Молонина, экспедицие пыриськись (Вологда). Озьы ик со пусйиз, Ижкар но элькун кивалтӥсьёсын пумиськонъёслы луыса улосвылэз азинтонъя программа дасямын вал шуыса, со азьланяз Удмуртилы шутэтсконъя дас тужгес усто улосвылъёс пӧлы пырыны луонлык сётоз.

6-тӥ толсуре ортчем котырес ӝӧк сьӧрын Егитъёслэн нырысетӥ финн-угор экспедицизылэн ёзчиосыз Удмуртиын этнотуризмез азинтон ужпумъёс но луонлыкъёс сярысь кенешизы, асьсэлэсь дэмланъёссэс веразы. Кылсярысь, егит туристъёсты Удмуртие кыскон понна та удысын выль технологиосты кутоно но дуннеысь мукет ужась практикаосты пунэмано шуыса пусйизы.

Тодэ вайытом, экспедицие Липецк, Астрахань, Вологда, Волгоград, Москва улосвылъёсысь но Удмуртиысь студентъёс, аспирантъёс, егит тодосчиос пыриськизы. Соос Сарапулэ, Воткае, Глазкаре, Ижкаре но мукет улон интыосы вуылӥзы, галереяослэн но музейёслэн адӟытонъёсынызы тодматскизы, вашкала лулчеберетэз утись гуртъёсы потазы, удмуртъёслэн улон-вылонзы, кылзы, йылолъёссы сярысь тросгес тодӥзы. Озьы ик егитъёс Сибирь трактэтӥ — финн-угор, славян но тюрк выжыысь калыкъёсты огазеясь сюресэтӥ ортчизы.

Экспедицилы йылпумъянъёсъя егит тодосчиос финн-угор калыкъёслэн улон-вылонзы, йылолъёссы сярысь фото- но видеоматериалъёсын бичет лэсьтозы. Россиысь финн-угор калыкъёслэн лулчеберетъя кылёсбурзы сярысь ивортодэтэз егитъёс пӧлын вӧлмытон понна ужрадэ пыриськисьёс нимысьтыз медиавӧлмет (медиапространство) кылдытозы.

Ватсалом, экспедициез Россиысь егитъёсын ужанъя федерал агентство радъяз.Ивор кутэмын УДМУРИЯ ивортодэтъя агентстволэн вотэсбамысьтыз.