4 нунал ӵоже форумлэн площадкаосаз быдэс кунысь вуэм егитъёс этно-лулчеберетъя ӵектосъёссэс улонэ пыӵатыны дышетскозы.

Дышетскон сессия 3-тӥзэ ортчытӥське. Туннэ со усьтӥськиз Ижкарысь Калыкъёслэн Эшъяськон юртазы. Егитъёслы сӥзёнъёсын вазиськизы Удмуртиысь йӧскалык политикая министр Лариса Буранова, Калыкъёслэн Эшъяськон юртсылэн кивалтӥсез Татьяна Боталова, «Вместе» огазеяськонлэн координаторез Мария Царёва но мер проектъёсъя федерал эксперт Сергей Тетерский.

«Центрмылэн валтӥсь меретэз – йӧскалык политика удысын тыршись ӧнерчиосты дасян. Мынам малпамея, тӥ кадь азьветлӥсьёслы та усто дышетскон площадка», – вазиськиз егитъёслы Лариса Буранова.

Сессие 9 улосвылъёсысь йӧскалык лулчеберетъя огазеяськонъёслэн азьветлӥсьёссы, ӧнерчиос вуизы: Марий-Элысь, Башкортостанысь, Алтайысь, Свердловск но Киров улосвылъёсысь, Ямало-Ненец но Ханты-Мансийск автоном округъёсысь, Камчаткаысь но Удмуртиысь.

Сессилэн нырысетӥ нуналаз ик пӧртэм пумиськонъёс, кенешонъёс ортчизы: ӵектонъёсъя «Этно – не секретно» ярмарка, Сергей Тетерскийен вераськон, «Мировое кафе» площадкаын кенешон, Россиын улӥсь калыкъёслэн эктонъёсынызы тодматскон ӝыт.

Сессилэн котькуд нуналэз тырмытэмын пайдалыко пумиськонъёсы, тренингъёсын, пумиськонъёсын, визьсынан шудонъёсын.

Нош ӝытъёсты егитъёсты возьмало йӧскалык позыръяськон но егитъёслэн театренызы пуктэм спектаклез учкон.

Сессилэн ужан радлыкеныз тодматскыны луоз татын.