15-16-тӥ южтолэзе удмурт егитъёслэн «Шунды» мерлыко огазеяськонзы Удмурт Элькунысь йӧскалык политикая министерстволэн но Калыкъёслэн Эшъяськон юртсылэн юрттэменыз валче удмурт азьветлӥсьёслы «Вуюись» дышетӥсь семинар ортчытӥз.

Ужрадэ пыриськизы «Шунды» огазеяськонлэн ёросъёсысь ёзэтъёсызлэн, Татарстан, Башкортостан, Перм улосъёсысь удмуртъёслэн огазеяськонъёссылэн егит азьветлӥсьёссы.

Семинарлэн программаез паськыт, пайдае но туныско вал. Кылсярысь педагог-психолэн Лариса Усковалэн тренингез нимаськиз ” Азьветлӥсь луон но командаен кивалтон”. Шаермылэн палэназ удмуртъёслэн кивалтӥсьёссы вераськизы команда сярысь: кызьы сое кылдытоно, кызьы ужано соин, кызьы ужез командаысь адямиос вискын люконо. Нош ёросъёсысь кивалтӥсьёс но азьветлӥсьёс Ольга Виатльевна Бускинаен ӵош эскеризы «Шунды» огазеяськонлэсь ёзэтъёсыны ужан амалъёссэ, кужмо но ляб палъёссэ. Семинаре пыриськисьёс узырмытӥзы асьсэлэсь шыкыссэс пӧртэм шудонъёсын, кудъёссэ соос асьсэ ужазы кутыны быгатозы. Нунал йылпумъяськиз выль удмурт киноез, «Пузкарез», учконэн.

Кыкетӥ нуналаз егитъёс басьтэм тодон-валанзэс юнматӥзы, команда кылдытыны юрттӥсь выль шудонъёсын тодматскизы.

Кык нунал куспын егитъёс зэмос команда луизы, эшъяськизы, азьланяз ӵошен ужаны план но лэсьтӥзы. Озьы, 18-тӥ оштолэзе Грак ёросын театр пуктонъёсъя вожвылъяськон ортчытыны малпазы. Башкир но бигер улосъёсысь егитъёс мылкыд каризы татчы пыриськыны.