Элькун Вӧйдыр Пичи Пурга ёросын ортчиз. Ужрад пӧртэм калыкъёсты люказ но 2026-тӥ арлэн, кудзэ Владимир Путин Россиысь калыкъёслэн огъя луэмзылэн ареныз юнматӥз, тужгес но яркытэз луиз.

Куноосты пумитазы Пичи Пурга ёрослэн Тӧроез Александр Деев, Удмурт Элькунысь Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськин, йӧскалык политикая министр Эдуард Петров,  Ӟуч лулчеберетъя огазеяськонэзлэн дано кивалтӥсез Сергей Фефилов.

Куноослы шулдыр программа возьмаз: яркыт геройёс, эктон но кырӟан номеръёс, Вӧйдур сульдэръёсын адӟытон, дӧдьы вылын ворттылонъёс. Шулдыръськонын ӟеч мылкыд кузьмазы Калык кырӟанъя, крезьгуръя но эктонъя «Танок» кун ансамбль, Можга карысь «Душечка» ӟуч кырӟанъя ансамбль, Сарапул карысь  «Синтетюриха» ӟуч кырӟанъя калык ансамбль но Огырчиысь «Голосочек» кырӟанъя ансамбль.

Элькун шулдыръяськонэ пиналъёс но, бадӟымъёс но шумпотыса пыриськизы. Куноослы 9 площадка дасямын вал: такмакъёсын  инты, батыр инты, лымы инты, мильым инты, ӧнеро инты, хоровод, ӵужонбол, валъёсын инты но калык шулдыръяськон.

«Туэ элькун Вӧйдыр быдэс элькунысь 4 сюрслэсь трос адями люказ. Шулдыръяськонэ йӧскалык-лулчеберетъя огазеяськонъёс пыриськизы, творческой коллективъёс но егитъёслэн огазеяськонъёссы. Таӵе ужрадъёс осконэз, ог-огдэ валанэз но Удмуртиысь калыкъёс куспын кусыпъёсты юнмато. УЭ-ысь Йӧскалык политикая министерствоен, элькунысьтымы Ӟуч лулчеберетъя огазеяськонэз, Калыкъёслэн Эшъяськон юртэн но Пичи Пурга ёрослэн Администрациен валче лэсьтэм ужен Вӧйдыр яркыт семья мылкыдо ортчиз», – пусйиз УЭ-ысь йӧскалык политикая министр Эдуард Петров.

Шулдыръяськонлэн йылпумъянэз – Вӧйдыр сульдэрез ӝуатон но бадӟым эшъяськон хоровод – калыкъёслэн тупаса улэмзылэн но умоезлы осконлэн тодметэз.

Тунсыко амалъёс, вожвылъяськонъёс, спорт нюръяськонъёс, мастер-классъёс но командаен шудонъёс пыр шулдыръяськон нылпиосты но бадӟымъёсты лулчеберетэ но сям-йылолъёсы муромытэ. Та уж кунмылэн Владимир Путин азьмуртэнымы юнматэм «Семья» йӧскалык ӵектосъёсызлы тупа.

Ужрадэз радъяло УЭ-ысь Йӧскалык политикая министерство, элькунысьтымы Ӟуч лулчеберетъя огазеяськон, Калыкъёслэн Эшъяськон юртсы но Пичи Пурга ёрослэн Администрациез.