Элькунамы быръемын пичи чеберайёс но батыръёс. Соос 42 кузя. Ваньзы соос 19-тӥ толсуре Ижкарысь Эшъяськон юртлэн сцена вылаз вормисьёслэн парадазы люкаськылӥзы.

Устоосысь пӧлысь устооссэ бырйизы туэ ёросъёсысь но Ижкарысь 25 нылпи садъёсын. Пиналъёс азе одӥг кадь куронъёс пуктэмын вал: кырӟаны но эктыны быгатэм сяна, одно ик удмурт кылэз тодоно.

«Фестиваль аспӧртэмлыко быръён луэ, со возьматэ – кыӵе нылпи садын удмурт кылэз нимысьтыз саклык висъяса дышето, нош кудаз огшоры фестивальлы гинэ дасяськыса, – шуэ «Удмурт нылкышно кенеш» огазеяськонлэн кивалтӥсез, фестивалез радъясь Надежда Степанова. – Жаляса верано, рос-прос анай кылмес дышетӥсьёсыз туж ӧжыт. Ӝыныез нылпиос фестивале пыриськыны гинэ дасямын. Но пусйыны кулэ – туж ӟеч. Со вера пиналъёслэн мылкыдзы, быгатонлыкъёссы вань шуыса, соосты дышетыны гинэ кулэ».

“Пичи чеберайёс но батыръёс” фестивальлэн одӥгез ужпумез – удмурт кылэз нылпиос пӧлы вӧлмытон луэ. Берло дыре тросаз ёрос нылпи садъёсын удмурт кылэз дышетонлы выльысь саклык висъяны кутско.

Вань чеберайёс но батыръёс ужрадысь пичи синпель кузьымен кошкизы. Фестиваль визьнодасьёсты но огазеяз. Соос ог-огенызы удмурт кылэз дышетон сярысь кенешизы, фестивалез радъясьёслы сӥзенъёссэс веразы.

Радъясьёс: «Удмурт нылкышно кенеш» огазеяськон, Калыкъёслэн Эшъяськон юртсы, Удмурт Элькунысь йӧскалык политикая министерство но «Удмурт Кенеш» ассоциация.

Ивор кутэмын: https://udmddn.ru/ivorjos/4958/