28 – 30-тӥ пӧсьтолэзе элькунамы вуизы Ермак атаманлэн сюресъёстӥз мынӥсь казакъёс.

29-тӥ пӧсьтолэзе Свято-Михайловской соборын молебен ортчиз. Куноосты ӟечкылаз Удмурт Элькун Тӧролэн но Кивалтэтлэн Администрацизылэн кивалтӥсезлэсь ужзэ быдэсъясь Сергей Смирнов. Сергей Витальевич пусйиз казачестволэсь егитъёсты атыкай музъемез гажаса будэтонын бадӟым интызэ. Волга котырысь казакъёслэн войскоеныз быдэстӥськись “Ермак атаманлэн сюрес кузяз” ӵектос но тӥни историез тодыны но гажаны дышетэ. Ижкарысь но Удмуртиысь митрополит Викторин бурсӥзиз казакъёсты, нош соослэн атаманзылы Юрий Ивановлы Архангел Михаиллэсь оброссэ кузьмаз. Со нуналэ ик “Боярская крепость” группаысь егит казакъёс «Радуга» клуб-отельлэн территорияз интернат-юртысь пиналъёслы вал вылын ворттылыны быгатэмзэс возьматӥзы. 30-тӥ пӧсьтолэзе казакъёс Пермь улосэ кошкизы. Йылпумъяськоз поход Тюмень улосысь Вагай гуртын, кытын 1585-тӥ арын Ермак бырын шедиз.

Ватсан: 24-тӥ инвожоысен 1-тӥ пӧсьтолэзёзь Самара улосын «Ермак атаманлэн сюресъёстӥз» («Дорогами атамана Ермака») ӵектослэн нырысетӥ этапез ортчиз. Казакъёс Волга шур кузя пыжъёсын 180 иськем ортчизы. 27-тӥ пӧсьтолэзьысен 9-тӥ гудырикошконозь ӵектослэн кыкетӥ этапез ортче. Ужрад сӥземын Ермак атаманэз но соин ӵош Сибире походэ (1581-1585 аръёс) пыриськем казакъёсты буре ваёнлы.