4-тӥ шуркынмонэ Калыкъёслэн огазеяськон Нуналзылы но Удмуртилэн кунлык басьтэмезлэн 105 ар тырмонэзлы сӥзьыса, огдышем сямен сяська понӥзы сыӵе синпелетъёс азе, кудъёсыз пуктэмын элькунлы кунлык басьтон понна бадӟым уж лэсьтӥсьёслы – Иосиф Наговицынлы, Трофим Борисовлы но Кузебай Гердлы.

Тодэ вайытом, Удмуртилэн кунлык басьтэмезлэн 105 ар тырмонэз улсын синпелетъёс но бюст выльдэмын – буязы, брусчатка тыризы, скамьяосты выльдизы. Коньдон элькун коньдэтысь висъямын.

Туннэ ужрадэ пыриськизы Вань удмуртъёслэн «Удмурт кенеш» улосвылкуспо мерлыко огазеяськонзылэн азьветлӥсьёссы, йӧскалык лулчеберетъя мерлыко огазеяськонъёслэн огмуртъёссы, депутатъёс но «Единая Россия» партилэн ёзчиосыз, Кузебай Герд нимо удмурт кун йӧскалык гимназиысь дышетӥсьёс но дышетскисьёс, нимысьтыз ожгар операцие пыриськисьёс, йӧскалык прессалэн журналистъёсыз но тросэз мукетъёсыз.

Вань люкаськемъёсты ӟечкылаз Удмурт Элькунысь Тӧролэн но Кивалтэтлэн Администрацизылэн кивалтӥсез Александр Журавлев.

«Ог дышем сямен ми люкаськиськом Иосиф Наговицынлы, Трофим Борисовлы но Кузебай Гердлы сӥзем синпелетъёссы доры – Удмуртилэсь кунлыксэ кылдытӥсьёслы йыбырттон понна. Туннэ «Удмурт кенеш» мерлыко огазеяськонзылэн азьветлӥсьёс сяна мукет йӧскалык мерлыкъёсысь но огмуртъёс вуизы. Малы ке шуоно асьмеос ваче улӥськомы, артэ, одӥг куншет улын. Ӵошен ужаськомы, нылпиосты будэтӥськомы, тушмонъёсын ожмаськиськомы. Отын, фронтын но, татын но. Валтӥсез – валче. Нимысьтыз тау бадӟымъёслы, дышетӥсьёслы, кудъёсыз тыршо  нылпиосмылы кунмылэсь но элькунмылэсь историзэ, сям-йылолъёссэ пыӵатыны.

Туннэ нуналэ удмурт лулчеберетлэн но йӧскалык аспӧртэмлыклэн азинсконэзлы, удмурт кыллэсь инлыксэ будэтонлы, удмуртъёслэсь асваланзэс улӟытонлы бадӟым юрттэт сётэ Вань удмуртъёслэн «Удмурт кенеш» улосвылкуспо мерлыко огазеяськонзы, кудӥз 1991-тӥ арын кылдэмын.