Удмуртилэн кунлыкезлы 105 ар тырмон араз Удмурт кылын шонер гожъяськонъя выль кыллюкам поттӥзы. Выль кыллюкамын удмурт кылэз дышетон, тодон, эскерон понна трос кулэ луись материал бичамын.

Кыллюкам «Удмурт Элькунысь кун кылъёсты но Удмурт Элькунысь калыкъёслэсь мукет кылъёссэс утён, дышетон но азинтон сярысь» кун программаез улонэ вӧлмытон улсын кылдытэмын.

Кыллюкам вылькылъёсын, асэстэмъёсын но мукет кылъёсын узырмиз. Книгае шонер гожъяськонъя но пус пуктылонъя выльдэм правилоос пыртэмын. Тодэ вайытом, берпуметӥ таӵе кыллюкам 2002-тӥ арын потэмын вал, отчы 30 сюрс пала кылъёс пыризы, нош выляз – 55 сюрс пала ини.

Удмуртиысь Тӧролэн но Кивалтэтлэн Администрацизылэн кивалтӥсез Александр Журавлёв тау кариз кыллюкамез поттӥсьёслы:

«Бадӟым уж лэсьтэмын. Ньыль ар ӵоже кыллюкам бордын история, кылъя но литературая институтысь, Удмурт кун университетысь ӧнерчиос но нимкылъёсъя но шонер гожъяськонъя элькун ӧри ужазы. Ойдолэ ӵош кылмес но лулчеберетмес эскеромы, асьме трос йӧскалыккуспо кунэнымы данъяськомы».

Шонер гожъяськонъя кыллюкамлэн тиражез – кык сюрс экземпляр. Та ужъемыж удмурт кылэз дышетӥсьёслы, журналистика но ивортодэтэз вӧлмытон удысын ужасьёслы, гожъясьчиослы, дышетскисьёслы бадӟым юрттэт луоз. Вуоно дыре кыллюкам каръёсысь но ёросъёсысь школаосы, лыдӟетъюртъёсы, «Удмуртия» книгапоттоние вуоз.