27-тӥ пӧсьтолэзьысен 9-тӥ гудырикошконозь «Ермак атаманлэн сюресъёстӥз» («Дорогами атамана Ермака») ӵектослэн кыкетӥ этапез ортчоз. Ужрад сӥземын Ермак атаманэз но соин ӵош Сибире походэ (1581-1585 аръёс) пыриськем казакъёсты буре ваёнлы.

Казаклэк зэмос эшез вал луэ. Соин ик таиз этапе 27-тӥ пӧсьтолэзе Самара карысь казакъёс сюрес вылэ потозы валъёс вылын. Сюрессы Самара, Свердловск, Пермь, Тюмень улосъёс но Удмурт Элькун пыр ортче. Огъя кузьдалаез – 3600 иськем. Походэ пыриське 60 адями, 25 вал.

Походэз радъясьёсты но сюресчиосты бурсӥзиз протоиерей, Суредаськонъя Россиысь Академилэн академикез, Россиысь писательёслэн союззылэн ёзчиез, но Россиысь тодмо дуннекотыръясь Федор Конюхов.

28-тӥ – 30-тӥ пӧсьтолэзе Ермак атаманлэн сюресъёстӥз мынӥсь казакъёс элькунамы вуозы. 29-тӥ пӧсьтолэзе, 10.00 часэ – Свято-Михайловской соборын молебен ортчоз, нош 15.00 часэ – походэ пыриськисьёс интернат-юртысь пиналъёслы вал вылын ворттылы быгатэмзэс возьматозы («Радуга» клуб-отельлэн территорияяз). 30-тӥ пӧсьтолэзе казакъёс Пермь улосэ мыныны потозы. Йылпумъяськоз поход Тюмень улосысь Вагай гуртын, кытын 1585-тӥ арын Ермак бырын шедиз.

Ватсан: 24-тӥ инвожоысен 1-тӥ пӧсьтолэзёзь Самара улосын ӵектослэн нырысетӥ этапез ортчиз. Казакъёс Волга шур кузя пыжъёсын 180 иськем ортчизы.