18-тӥ коньывуонэ Калыкъёслэн Эшъяськон юртазы вуылӥз В.Д. Поленов нимо Россиысь калык творчествоя кун юртлэн кивалтӥсезлэн нырысетӥ воштӥсез, Россиысь калыкъёслэн лулчеберется центрлэн кивалтӥсез, Россия Федерацись лулчеберет удысысь дано ужась Мери Русанова.

Нырысь ик куноез тодматӥзы Калыкъёслэн Эшъяськон юртэнызы. Юртлэн кивалтӥсез Татьяна Боталова пусйиз элькунамы 130 пала йӧскалыкъёс уло шуыса. Туннэ нунал понна Калыкъёслэн Эшъяськон юртазы ужало элькунысьтым 36 мерлыко огазеяськонъёс. Татын соос ортчытъяло пӧртэм пумо ужрадъёс: конференциос, семинаръёс, пумиськонъёс, йӧскалык шулдыръяськонъёс но фестивальёс.

Пумиськонэз азьланьтӥз Удмуртиысь калык лулчеберетъёслы сӥзем ужрадъёсын тодматон, соос пӧлын ӟуч лулчеберетлы сӥзем «Высокий берег» фестиваль, финн-угор егитъёслэн «Палэзян» фестивальзы но «Пельняньлэн дунневыл нуналэз» фестиваль.

Мери Русанова тау кариз пайдалыко пумиськон понна. Калыкъёслэн Эшъяськон юртсылы Россиысь калыкъёслэн лулчеберетсыя центрен кусыпъёсты юнматыны ӵектӥз.

Ужрадэ пыриськизы Удмурт Элькунысь йӧскалык политикая министр Л.Н. Буранова, министрлэн воштӥсез Л.Ю. Соковикова, Калыкъёслэн Эшъяськон юртсылэн кивалтӥсез Т.П. Боталова.

Тодады вайытон, Мери Русанова Удмуртие вуылӥз финн-угор егитъёслэн «Палэзян» VII Калыккуспо фестивальзы улсын ортчись ужрадъёсы пыриськыны