Калыкъёслэн огазеяськон нуналзы азьын, 3-тӥ шуркынмонэ, Россилэн котькуд улосаз «Этнографияя бадӟым диктант» акци ортчоз. Туэ ужрад калыккуспо луоз, угось сое ортчытон борды Россотрудничество но басьтӥськиз . Соин ик асьсэлэсь тодон-валанзэс эскерыны быгатозы кунгож сьӧрысь улосчиосмы но.

«Россия аспӧртэмлыко луэ аслаз трос пӧртэм выжы калыкеныз. Асьмелэн кунамы 193 пӧртэм калык улэ. Макем ӟеч тодӥськомы бускель калыкъёслэсь историзэс, сям-йылолъёссэс, лулчеберетсэс? Та юанъёслы валэктон шедьтыны вылысь ик радъяське Этнографяя бадӟым диктант. Кылем арын акция нырысьсэ ортчиз. 800 площадкаосын 90 сюрс пала адями тодон-валанзэ эскериз. Ужрадлы туж трос ӟеч вазёнъёс вуизы, соин ик ми малпамы азинтыны мытэм ужмес. Вань мылыкыд карисьёсты, озьы ик кунгож сьӧрысь улосчисмес, ӧтисько 3-тӥ шуркынмонэ кунмы сярысь тодон-валанмес эскерыны», – пусйиз Россиысь йӧскалык ужпумъёсъя федерал агентстволэн кивалтӥсез И.Баринов.

Диктант гожтыны быгатэ котькуд мылкыд карись. Со понна вазиськоно улосысь площадкае,яке Россотрудниволэн кунгожсьӧрысь представительствояз. Площадкаослэсь интыяськемзэс тодыны луоз www.miretno.ru но www.fadn.gov.ru вотэсбамъёсы пырыса, озьы ик ивортодэд пуктэмын луоз «Этнографияя бадӟым диктант» нимо мерлыко огинъёсын. Акцилы йылпумъянъёс лэсьтэмын луозы Росилэн Кункатэзлэн нуналаз, 12-тӥ толшоре.

Акциез ортчыто Россиысь йӧскалык ужпумъёсъя федерал агентство но Удмурт Элькунысь йӧскалык политикая министерство.

Ватсаса ивортон: 2016-тӥ арын «Этнографияя бадӟым диктантэз» 90 сюрс пала адями гожтӥз: 35 сюрсэз нимысьтыз радъям площадкаосы лыктыса, 50 сюрсэз – вотэсбамын. Акцилэн тужгес но егит пыриськисез Ульяновск улосысь 12 аресъем нылаш луиз, нош самой арлыдоез – Мордовиысь 80 аресъем воргорон. Диктант понна шоро-куспо оценка – 54 балл (100 пӧлысь).