Та нуналъёсы огъя Россиын ортчись «Этнографияя бадӟым диктант» акциез дасян уж мынэ. Со бордын Россия Федерациысь йӧскалык ужпумъёсъя агентстволэн юрттэмез улсын Удмурт Элькунысь йӧскалык политикая министерство, Удмуртиысь калыкъёслэн ассамблеязы тыршо. Ужрадэз, кызьы ивортэмын вал азьвыл, 4-тӥ коньывуонэ ортчытыны чакламын.

– Диктантын 30 юан луоз. Юанъёс тест формаен кылдытэмын, сӥземын соос Россиын улӥсь калыкъёслэн лулчеберетсылы, сям-йылолъёссылы, историзылы. Котькуд ёросын 7 площадка усьтыны чакламын. Одӥгез сыӵе площадка Калыкъёслэн Эшъяськон юртазы ужалоз. Со сяна, мылкыд карисьёс тодон-валанзэс эскерыны быгатозы «Мир Этно» вотэс бамын он-лайн тест лэсьтыса. Акцилы йылпумъянъёс лэсьтэмын луозы 4-тӥ шуркынмонэ. Диктант Россиын улӥсь адямиослэсь бускель калыкъёс сярысь тодон-валанзэс эскерыны, калык лулчеберетэз утьыны, калыкъёс куспын тупаса улонэз юнматыны юрттоз. Акция калыклэсь тодон-валанзэ возьматон сяна, этнография тодослы саклык висъяны юрттоз. Шаерамы трос калыкъёслэн тупаса улэмзы бордын асьмелэн кужыммы но азинтӥськоны быгатонлыкмы, – вера Удмурт Элькунысь йӧскалык политикая министр Лариса Буранова.