Туэ Этнографияя бадӟым диктантэз 367 сюрс адями гожтӥз, со кылем арен ӵошатыса, 4 поллы тросгес луэ.

2016-тӥ арен ӵошатыса, площадкаослэн но лыдзы йылӥз: кылем арын 800, нош туэ 2600 площадкаос ужазы. ТАСС агентстволэн, «Комсомольская правда» газетлэн но Удмуртилэн Кивалтэтэзлэн электронной площадка лэсьтыны юрттэменызы, 200 сюрс адями тодон-валанзэ онлайн эскеризы.

Йӧскалык ужпумъёсъя федерал агентстволэн кивалтӥсезлэн Игорь Бариновлэн ивортэмезъя, тужгес но трос площадкаос ужазы но трос калык диктант гожтӥз Москваын (18 сюрс адями) но Саха Элькунын (Якутия) (10 сюрс адями). Туэ улосъёс паймытъязы акциез ортчытыны аспӧртэмлыко инты быръеменызы. Кылсярысь, Мурманскын диктант гожтӥзы «Владивосток» ледоколын, Дербентысь калык люкаськиз Нарын-Калы крепосте, Магасын тупаса улонлы сӥзем 100 метръем башняын визь сыназы, Краснодарын тодон-валанзэс эскеризы Кубаньысь казак корпусын.

Со сяна, туэ кунгож сьӧрысь улосчиосмы но акцие пыриськизы. Таӵе луонлык кылдытӥз Россотрудничество. Акцие тужгес но мыло-кыдо пыриськизы Киргизиын улисьёс (СНГ старнаосысь огъя пыриськемъёслэн 23%-эз), кыкетӥ интыын Таджикистан, Молдова куинетӥ инты басьтӥз.

Россиын улӥсьёслэн шорокуспо баллзы 17,4 луиз (огъя 30 басьтыны луоно вал) – кылем арен ӵошатыса 4%-лы тросгес. СНГ-ын улӥсьёслэн шорокуспо баллзы ичигес – 16,5. «СНГ-ын акцие тросгес егитъёс пыриськизы , но, жаляса верано, соослэн тодон-валанзы арлыдоосын ӵошатыса, лябгес на. Таӵе югдур медаз кылды шуыса ик ортчытиськом акцимес. Мон оскисько, асьмелэн ваньмыз пӧрмоз шуыса», – валэктӥз Игорь Баринов.

Кылем арын сямен ик, кышномуртъёс мыло-кыдогес эскеризы тодон-валанъёссэс (70% пыриськисьёс – кышномуртъёс).

Диктантлы йылпумъянъёс лэсьтонъя пресс-кноференциын дипломъёсын пусъемын вал куд-ог улосъёс: Саха Элькун (Якутия) пусъемын кышкасьтэм луэмез понна (угось диктатнт гожтон нуналэ 45 градус кезьыт вал), Москва – ужрадэ тужгес но трос калыкез кыскыны быгатэмез понна, Удмурт Элькун – акциез ортчытонын оскымон эш луэмез понна, Ингушетия – тужгес визьмо элькун луиз.

Озьы ик нимысьтыз пусъемын тужгес но егитэз пыриськись – Москваысь нырысетӥ классын дышетскись 7 аресъем пияш (кылем арын тужгес егитэз луиз вал Ульяновск улосысь 12 аресъем нылаш).

«Этнографияя бадӟым диктант калыкъёслы асьсэды кулэен шӧдыны луонлык сётэ, кунмылэсь пӧртэм выжы калыкъёслэсь лулчебертсэс но сям-йылолъёссэс утён сярысь сюлмаськемзэ возьматэ, Россилэсь пушдунне узырлыксэ пусъе. Но валтӥсь ужпум – кунамы улӥсь калыкъёсты югдытон, трос пӧртэм калыкъёс сярысь тодэтъёсты вуттон», – йылтӥз Федерал агентстволэн кивалтӥсез.

Улосъёслэн рейтингзы (инъет луэ пыриськисьёслэн лыдзы).

1) Москва 18343 адями;

2) Саха Элькун (Якутия) 10187;
3) Удмурт Элькун 9251;
4) Красноярск улос 6054;
5) Тула улос 5710;
6) Крым Элькун5139 ;
7) Пермь улос 4058;
8) Самара улос3838;
9) Оренбург улос3700;
10) Ингуш Элькун3565;

Улосъёслэн рейтингзы (инъет луэ шорокуспо балл)

1) Ингуш Элькун 28,09;
2) Татар Элькун 23,7;
3) Уйпал Осетия-Алания Элькун 23,4;
4) Кабардино-Балкар Элькун 21,86;
5) Карачаево-Черкес Элькун 21,64 ;
6) Башкорт Элькун 21;
7) Дагестан Элькун 20,623;
8) Мордва Элькун 20,4;
9) Курск улос 20;
10) Алтай Улос 20.