20-тӥ пӧсьтолэзе Йошкар-Ола каре Россия Федерацилэн Президентэз бордысь йӧскалык кусыпъёсъя кенеш люкаськылӥз. Таяз радэ со сӥземын вал улосъёсын но муниципал кылдытэтъёсын Россиын 2025-тӥ арозь кутэм йӧскалык политикая стратегиез быдэстонлы. Ужрадэ докладэн пыриськиз элькунысьтымы ӟуч лулчеберетъя мерлыко огазеяськонлэн ёзчиез М.Ф. Фефилов. Максим Федорович инвортон лэсьтӥз “Этнографияя бадӟым диктант” акци сярысь. Со пусйиз ӵектон быдэстӥське Удмурт Элькунысь йӧскалык политикая министерстволэн но “Удмуртиысь калыкъёслэн ассоциацизы” мерлыко огазеяськонлэн кичӧлтэменызы Россиысь йӧскалык ужпумъёсъя федерал агентстволэн юрттэмез улсын. Аспӧртэмлыко диктант нырысьсэ радъяськиз 2016-тӥ аре, сӥзьыл. Татчы Россилэн вань улосъёсыз сяна, Турциын, Израильын но Швейцариын улӥсьёс пыриськизы . 35 сюрс адями юанъёслы валэктон сётӥзы нимысьтыз радъям интыосын, нош 50 сюрслэсь тросэз визьзэс сыназы интернет пыр. Акция луонлык сётӥз калыкмылэсь этнографияя тодон-валанзэ, Россиын улӥсь калыкъёс сярысь тодон-валанзэ эскерыны, этнография тодослы саклык висъяны. “Диктантэз котькуд аре Калыкъёслэн огазеяськемзылы сӥзем нуналэ ортчытса, сое арлы быдэ ортчись акци карыны луэ. Ӵапак соин но туэ акцимес 3-тӥ шуркынмонэ ортчытыны чакласькомы. Оскиськомы ӵектосмылэн географиез паськыталоз шуыса. Нырысетӥ диктантэ кунгож сьӧрысь улосчиослэн пыриськемзы возьматэ: ӟуч кыл но Россиысь калыкъёслэн лулчеберетэнызы тунсыкъяськон пӧртэм сэрегъёсысь адямиосты огазея, “- вераз М.Фефилов.

Пусйымон соиз но, та пумиськонын ик Удмурт Элькунмес аслаз вераназ мукет улосъёслы примере пуктӥз Россия Федерацилэн Кивалтэтэзлэн Тӧроезлэн воштӥсез А.Г. Хлопонин: “…. интыысь кивалтэтэн ужез радъяно, куд-ог улосъёслэн ужзы возьматэ, пайдалыко но ӟеч ужаны городъёсын гинэ ӧвӧл, гуртъёсын но луоно. Кӧня ке пример вераме потэ. Кылсярысь, Удмурт Элькунын интыысь кивалтэтъёсын йӧскалык ужпумъёсъя 30-лэсь ятыр координационной кенешъёс кылдытэмын”.