4-тӥ коньывуонэ Удмурт Элькунысь йӧскалык политикая министерстволэн но «Удмуртиысь калыкъёслэн ассамблеязы» мерлыко огазеяськонлэн кичӧлтэмзыя но Россия Федерациысь йӧскалык ужпумъёсъя агентстволэн юрттэмез улсын «Этнографияя бадӟым диктант» акци ортчоз. Ужрад нырысьсэ радъяське, татчы Россиысь вань 85 улосъёс пыриськозы.

Удмурт Элькунысь йӧскалык политикая министерство быдэс Россиын ортчись акцилэн координаторез луэ.

Та дырлы тодмо ини 550 площадкаос. Диктантэз ортчытыны юрттозы вылӥ дышетон ужъюртъёс, калыкъёслэн эшъяськон юртъёссы, удысужлы дышетон ужъюртъёс, йӧскалык центръёс, лыдӟетъюртъёс. Акциез ортчытон площадкаослэн лыдзы нуналлы быдэ йылэ. Удмурт Элькунын 70 площадка пусъемын, интыяськемыны соос котькуд муниципал кылдытэтын.

Москваын валтӥсь площадка Россиысь кун лыдӟетъюрт луоз. Ужрадэ пыриськозы Россиысь Президентлэн Администрациеныз кивалтӥсезлэн воштӥсез Магомедсалам Магомедов, Россия Федерациысь Кивалтэтлэн Тӧроезлэн воштӥсез Александр Хлопонин, Россия Федерациысь йӧскалык ужпумъёсъя агентстволэн кивалтӥсез Игорь Баринов, Москваысь йӧскалык политикая, улосвыл кусыпъёсъя но туризмъя департаментлэн кивалтӥсез Владимир Черников, Россия Федерациысь Мерлыко палаталэн егитъёслэн кичӧлтонъёссылы юрттэт сётонъя ӧрилэн тӧроез Сангаджи Тарбаев но мукетъёс.

Удмурт Элькуныны валтӥсез площадка – Калыкъёслэн Эшъяськон юртсы. Ужрадэ пыриськозы элькунмылэн Тӧроез Александр Соловьёв но мукет политикъёс, мерлык удысын ужасьёс.

Диктантэ пыриськыны быгато Россиын но кунгож сьӧрын улӥсьёс, кинлы 15 арес тырмемын ини. Адямилэн дышетскемез, мер статусэз, осконэз лыдэ уг басьтӥськы. Акци шаерамы улӥсьёслэсь бускель калыкъёс сярысь тодон-валанзэс эскерыны юрттоз, этнография тодослы саклык висъялоз, угось ӵапак та тодос калыкъёслэсь кусыпъёссэс юнматонын бадӟым инты басьтэ.

Диктантэ пыриськисьёс сётэм дыр куспын 30 юанлы валэктон сётоно луозы. Уж понна огъя 100 балл басьтыны луэ. Визез сынан интыослэсь адресъёссэс тодыны луэ www.miretno.ru нимлыко вотэсбамын но мер вотэсъёсын «Этнографияя бадӟым диктант» группаосын. Ужрадэ пыриськыны луоз дунтэк. Азьпаласен ик пусйиськыны кулэ ӧвӧл. Со сяна, кин пусъем интые мыныны уг быгаты, солэн диктантэз гожтыны луонлыкез вань miretno.ru сайтын.

Акцилэн йылпумъянъёсызъя этнографиез дышетонэз радъянъя но ӟечомытонъя, калык кусыпъёсты юнматонъя дэмланъёс кылдытэмын луозы.

«Россын улӥсь калыкъёслэн лулчеберетсы но сям-йылолъёссы этногрфияя диктантлэн 30 юаназ нокызьы но уз тэре. Но милям валтӥсь ужпуммы – акция бере Россиын улӥсьёслэн асьсэлэсь выжызэс, калыксылэсь сям-йылолъёссэ, бускель калыкъёслэсь лулчеберетсэс тодыны но дышетыны мылкыдзэс пуромытон. Угось ог-огдэ тодон но гажан бордысь потэ пӧртэм выжысь калыкъёслэн куспазы тупаса улонзы», – валэктэ Россия Федерациысь йӧскалык ужпумъёсъя агентстволэн кивалтӥсез Игорь Баринов.

Чакланъёсъя, этнографияя тодон-валанэз эскерись акцие 35000-лэсь ятыр адями пыриськоз.

Тодады вайытом, «Этнографияя бадӟым диктант» ортчоз 4–тӥ коньывуонэ интыысь дыръя 11.00 часэ.

Нимлыко вотэсбам: www.miretno.ru

ВКонтакте вотэсын: https://vk.com/miretno