20-21-тӥ шуркынмонэ Калыкъёслэн Эшъяськон юртазы котырес ӝӧк сьӧрын кенешизы анай кылэз дышетон но пӧртэм калыкъёс сярысь тодонъёсты сётон сярысь.

«Котырес ӝӧк ортчытонлэн мугез – 7-тӥ толшоре ортчоно паськытатэм коллегилы ӵектонъёсты но малпанъёсты люкан. Коллегилэн темаез – «Удмурт Элькунын Россия Федерацилэсь кун йӧскалык политикая Стратегизэ пӧртэм калыкъёс сярысь тодонъёсты сётонэз азинтон пыр быдэстон», – пусйиз йӧскалык политикая министр Л.Н. Буранова.

Коллегилы дасяськон улсын ньыл котырес ӝӧкъёслэн ужзы радъямын вал. Нимысьтыз площадкаосын кенешизы удмурт, ӟуч, бигер но пор кылъёсты дышетон сярысь. Ужрадэ пыриськизы Йӧскалык политикая, Дышетонъя но тодосъя министерствоосысь, Ижкар Администрациысь дышетонъя кивалтонниысь, Дышетон удысысь йӧскалык ужпумъёсты дышетон-эскерон институтысь, Дышетонэз азинтонъя институтысь кивалтӥсьёс но ӧнерчиос, озьы ик Удмурт Элькунысь Кун кенешысь депутатъёс, иворчиос, мерлыко огазеяськонъёслэн азьветлӥсьёссы.

Ӝутэмын вал лэчыт юанъёс: дышетон ужъюртъёсын анай кылэз дышетон, йӧскалык дышетонэз азинтон вылысь катъёсы воштонъёс, ватсанъёс пыртон, пӧртэм калыкъёс сярысь тодонъёсты сётонэз радъян, та удысын ӧнерчиосты дасян.

“РФ-лэн йӧскалык политикая кун Стратегияз пусъемын, дышетон сӧзнэт йӧскалык кылъёсты утьыны но азинтыны, кыккылолыкез азинтыны юрттыны кулэ шуыса, но туала механизмъёс ӵапак мукет югдуре вуттыны быгато, – пусйиз Дышетонъя но тодосъя министерстволэн йӧскалык дышетонъя секторезлэн кивалтӥсез Валентина Корепанова. – Анай кылъёслы дышетон йылаз-пумаз вуттэмын ӧвӧл на федерал министерствоын. Анай кылэз дышетыны соглаш луэм сярысь заявлениез кулэ карон, югдурез шугомытыны быгатэ. Кылсярысь, удмурт кылэз дышетыны мылкыд карисьёслэн лыдзы кемыны быгатэ: ӟучомем удмурт нылпиос пумитъяськыны быгато, удмурт анай-атайёс пиналзылы ӟуч кылъя ЕГЭ сётонэз малпаса, ӟуч кылэз удмурт кыл интые бырйыны быгато”.

Кенеше пыриськемъёс огъя малпанэ вуизы – Удмуртиын пӧртэм калыкъёс сярысь тодонъёсты сётонъя нимысьтыз Программа дасяно. Сэрттэм-пертчем юанъёсъя малпанъёссэс но ӵектонъёссэс Лариса Буранова Удмурт Элькунысь йӧскалык политикая министерствое келяны куриз.

Ужрадъясьёс: Удмурт Элькунысь йӧскалык политикая министерство, Калыкъёслэн Эшъяськон юртсы Удмурт Элькунысь дышетонъя но тодосъя министерстволэн но Дышетонэз азинтонъя институтлэн юрттэменызы.