4-10-тӥ толсуре 2017-тӥ аре элькунамы Егитъёслэн I эскерон финн-угор экспедицизы радъяське. Татчы пырисько Липецк, Астрахань, Вологда, Волгоград но Москва улосъёсысь студентъёс, аспирантъёс но егит тодосчиос. Егитъёслэн тунсыкъёссы герӟаськемын этнологиен, антропологиен, культурологиен, этнопсихологиен, йӧскалык политикаен. Тодосчиослэн валтӥсь ужпумзы – финн-угор калыкъёслэн улон-вылонзы, сям-йылолъёссы сярысь тодэтъёс люкан, пӧртэм улосын улӥсь егитъёсын эшлыко кусыпъёс тупатон, Россиысь финн-угор калыкъёс сярысь тодон-валанэз егитъёс пӧлын вӧлмытон.

6-тӥ толсуре егитъёс Ижкарын котрыес ӝӧк сьӧрын этнотуризмез азинтон сярысь кенешизы.

Та удысысь ужпумъёсты егитъёсын ӵош сэрттӥзы-пертчизы йӧскалык политикая министр Лариса Буранова, лулчеберетъя но туризмъя министрлэн воштӥсез Денис Утробин, «Удмурт Кенеш» ассоциацилэн но Ижкарысь мер палаталэн ёзчиез Леонид Гонин, политика но мерлык удысчи Сергей Буторин, кластер амалэз азинтонъя центрлэн кивалтӥсез Полина Павлова, кар ӵектосъёсъя «Лифт» штаблэн кивалтӥсез Дмитрий Шевкунов, егитъёслэн мерлыко огазеяськонъёссылэн ёзчиоссы.

Котырес ӝӧк сьӧрын Удмурт Элькунамы туризмез азинтоз сярысь пӧртэм малпанъёс но учконъёс чузъяськизы.

Лариса Буранова пусйиз: «Экспеция формат – элькунэнымы тодматскон понна туж тунсыко но пайдалыко формат: маршрутэз ортчыку кылдо чакламтэ но туныско югдуръёс, соин ик солэсь йылпумъянъёссэ азьлапаласен тодыны уг луы. Форуменн но ӧтчамен ӵошатоно ке, экседицилэн географи ласянь нокыӵе сюбегатонъёсыз ӧвӧл». Озьы ик министр Егитъёсын ужанъя федерал агенстволэн кивалтӥсеныз Александр Бугаевен пумиськемез сярысь ивортӥз. Кивалтӥсьёс огкылэ вуизы – 2018-тӥ арын Удмуртиын Финн-угор егитъёслэн нырысетӥ форумзы ортчоз.

Сергей Буторин, мерлык но политика удысчи, пусйиз: «Адямиослэн историез дышетэмзы потэ, Россия Федерацилэн улосвылтӥз ветлэмзы потэ, таӵе экспедициос луонлык сётон улосъёсын мургес тодматскыны».