Егитъёсын ужанъя федерал агентстволэн кивалтӥсез но Удмурт Элькунысь йӧскалык политикая министр Москваын пумиськон ортчытӥзы.

Удмурт Элькунысь йӧскалык политикая министр Лариса Буранова но Росмолодёжилэн кивалтӥсез Александр Бугаев огъя малпанэ вуизы, дышетон форумъёс но экспедициос финн-угор егитъёслы ог-огенызы кусып возьыны но ӵектосъёс быдэсъяны туж кулэлыко площадка луыны быгато шуыса. Со сяна, таӵе ужрадъёс юрттозы финн-угор калыкъёслэсь сям-йылолъёссэс, лулчеберетсэс утьыны, егитъёс пӧлы вӧлмытыны.

Лариса Николаевна ӵектӥз 6-тӥ толсуре Калыкъёслэн Эшъяськон юртазы финн-угор Экспедицие пыриськисьёслы элькунысьтымы азьветлӥсь егитъёсын кенеш радъяны.

«Ми элькунамы егитъёслы сӥзем трос ужрадъёс ортчытъяськомы, но милям валтӥсь ужпуммы – соослэсь дышетон люкетсэс кужмоятон, калыклы пайдалыко карон», – пусйиз Л.Н. Буранова.

Александр Бугаев вераз Федерал агентстволэн егитъёслэн ужрадъёссылы дышетон программаос кылдытъямзы сярысь: «Ми нырысь ик тыршиськомы ужрадъёсы удысысь экспертъёсты ӧтьыны. Егитъёс мастер-классъёсын но кенешъёсын удысужлыко тодон-валанъёс но быгатонлыкъёс басьтыны мед быгатозы.

2018-тӥ арын финн-угор егитъёслэсь форумзэс Удмурт элькунын ортчытыны чакламын.