Ижкарын мерлыко огазеяськонъёслэн командаоссы пӧлын футзалъя дасэтӥез Элькун чемпионат ортчиз. Турнир сӥземын вал Атыкай музъемез утисьёслэн нуналзылы. Чемпионат арлы быдэ радъяське Элькунысь армянъёслэн «Урарту» мерлыко огазеяськонзылэн кичӧлтэменызы. Валтӥсь меретэз – пӧртэм выжыысь калыкъёслы ог-огзэс валаны юрттон, эшъяськон кусыпъёссэс радъян, кужмо спортсменъёсты шараян.

Командаослы ӟечкыланъёсын но сӥзенъёсын вазиськизы йӧскалык политикая министр Лариса Буранова, Удмуртиысь калыкъёслэн ассамблеязылэн тӧроез Владимир Байметов но мерлыко огазеяськонъёслэн кивалтӥсьёссы.

Ӵошатсконэ мерлыко огазеяськонъёслэн 18 командазы пыриськиз: Удмурт Элькунысь ӟуч лулчеберетъя мерлыко огазеяськонлэн, армянъёслэн «Урарту» мерлыко огазеяськонзылэн, мордваослэн «Умарина» мерлыко огазеяськонзылэн, чечен йӧскалык лулчеберетъя «Даймохк» центрзылэн, грекъёслэн «Никея» огазеяськонзылэн, удмурт егитъёслэн «Шунды» мерлыко огазеяськонзылэн. Еврей лулчеберетъя центрлэн но мукет. Туэ кужымзэс эскерыны УдГУ-ын дышетскись кунож сьӧрысь студентъёс но мылкыд каризы, соос кык команда люказы.

Кык нунал ӵошатскемзы бере, кужмоосыз командаос шараяськизы: 3-тӥ интыын бигер егитъёслэн «Иман» мерлыко огазеяськонзылэн командазы, 2-тӥ интые потӥзы мордваос, нош нырысетӥ интыын – «Хазар» команда (Азербайджанъёслэн «Достлуг» мерлыко огазеяськонзылэн командазы).