«Событийный турмаршрут» – Приволжье» автопробеге пыриськисьёс кык нунал ортчытизы Удмуртииын. Та нуналъёс тырмемын вал тунсыко пумиськонъёсын, кулэлыко вераськонъёсын.

Аавтпробеглэн картаяз Приволжьеысь со интыос пыртэмын, кудъёсыз «Russian Event Awards», «Маршрут года», «Туристический сувенир» туризм удысъя ӵошатсконъёсын вормисе потэм ӵектосъёс быдэстӥсько.

Пробеге пырисько: Геннадий Шаталов – туризм удысъя “Russian Event Awards” йӧскалык премиез но “Маршрут года” Россиысь премиез, “Туристический сувенир” фестиваль-вожвылъяськонэз кылдытӥсь; Вероника Косых – “Russian Event Awards”, “Маршрут года”, «Туристический сувенир» федерал премиослэн быдэсъясь дирекцизылэн кивалтӥсез.

25-тӥ оштолэзе куноос вуизы Ижкаре. Нырысетӥ нуналэ Ижкарен тодматскизы, Брангурт песянайёс доры куное вуылӥзы. Та нуналэ ик Удмурт Элькунысь йӧскалык политикая министрен Лариса Николаевна Бурановаен пумиськизы. Пумиськонын вераськон мынӥз ужрадъёсты туристъёслы тунсыко карон сярысь, элькунамы туризмез азинтонлэн кулэлыкез сярысь.

26-тӥ оштолэзе «Интеграция события в турпродукт» нимо котырес ӝӧк радъяськиз. Татчы пыриськизы Калыкъёслэн Эшъяськон юртысьтызы, лулчеберетъя но туризмъя министерствоысь ӧнерчиос, “Всемирный день пельменя” фестивалез радъясьёс.

Геннадий Шаталов пусйиз туннэ нуналэ туризмлэсь аспӧртэмлыксэ – туристъёслэсь учкись гинэ луэмзы уг поты, соослэн ужрадэ пыриськемзы потэ. Соин ик туж кулэ интерактивной ужрадъёс кылдытыны.

Удмуртилэн вань сыӵе луонлыкъёсыз. Кылсярысь – пельнянь кутонъя мастер-класс. «Боброва долина» ресторанын Генадий Шаталов та луонлыкез эскериз. Пельнянь со кутӥз кубисталэсь, ӟазег сӥльлэсь. Татчыозь куномы тӧдьы пызьлэсь, парсь яке кунян сӥльлэсь гинэ пельнянь веръямез вылэм. Татын нырысьсэ эскериз мукетъёссэ.

Та нуналэ ик «Лудорвай» музеен тодматскон ортчиз.

Автпробег сюрессэ азьланьтоз Пермь, Киров, Нижний Новгород, Касимов, Воронеж городъёстӥ. Быдэс маршрутсылэн кузьдалаез ог 4400 км..

Та пумиськонъёс,тодматсконъёс, вераськонъёс инъет луозы улосвылкуспо проектъёслы. Оскон кылдэ Удмуртия пӧртэм маршрутъёсы пыртэмын луоз шуыса.