20-тӥ инвожое элькунмылэн уйпалаз, Кез ёросысь Югуртын, удмурт калыклэн яратоно шулдыръяськонэз, Гербер, ортчоз.

Гербер – удмурт калылэн дырпусаз одӥгез валтӥсь шулдыръяськон луэ. Со тулыс музъем ужъёслэн йылпумъяськонзылы сӥземын. Кизёнэз ӟечен быдтэмезлы шумпотыса но Инмарлы, Куазьлы но Кылдысинлы тау карыса калык куриське, ӝук пӧзьтэ, азьланяз удалтэм ю-нянез араны ӟеч куазь куре.

Герберлэн прологаз возьматэмын луоз удмурт инмаръёслэн улонысьтызы учыръёс. Шулдыръяськонэз усьтэм бере (11.00 час.) валтӥсь сцена вылын возьматэмын луозы кӧня ке программаос. Кылсярысь, «Ошмес гур» программаын учкыны луоз эстрада коллективъёслэсь но фольклор ансамбльёслэсь номеръёссэс. «Удмурт коштан» программаын калык шӧмен вурем дӥськутъёсты возьматозы. Котьку сямен пӧртэм сэрегъёслэн ужъёссы радъяськоз. «Мудор» сэрегын вӧсясьёс ӝук пӧзьтозы но сое вӧсялозы. «Тэтчанни» сэрегын калык эктонъёслы дышетозы. «Пичи Гербер» сэрегын нылпиос шудозы, «Вуюись улын ШУНДЭКТОН» сэрегын – егитъёс шулдыръяськозы. Аспӧртэмлыко вожвылъяськонъёс но радъямын луозы. Кылсярысь, мотоблокен ӵошатсконъё, выль кенъёслэн вожвылъяськонзы. Котьку сямен ик киужъёсын адӟытон-вузкарон ужалоз.

Туэ нырысьсэ радъямын луоз «Шулдыр шулан дыр» сэрег. Со сӥземын калык крезьгуро инструментъёслы. Кез ёросысь удмурт гуртъёсын возиськемын на пелляса шудон калык инструментэн, узьыгумыен, но мукет шуланъёсын шудон. Та сэрегын мылкыд карисьёслы пелляса шудон крезьгуро инструментъёсты лэсьтонъя мастер-классъёс валтӥсь ӧнерчиос но кибашлыос радъялозы.

Герберез радъяло: Удмурт Элькунысь йӧскалык политикая министерство, Удмурт Элькунысь гуртвозёсъя но сиён-юон поттонъя министерство, Калыкъёслэн Эшъяськон юртсы, «Кез ёрос» муниципал кылдытэт, Вань удмуртъёслэн «Удмурт кенеш» огазеяськонзы, удмурт егитъёслэн «Шунды» огазеяськонзы .

Ватсаса ивортодэт: 63-10-26 – Андрей Николаевич Прокопьев

Прогамма:

9.30-10.30 – «КУНО ПУМИТАН» – куноосты но делегациосты пумитан;

10.00-16.00 – «УСТОЧИКАР» – калык киужъёсын адӟытон-вузкарон;

-«ВУЗКАРОННИ» – сиён-юонъёсын вузкарон;

10.00-11.30 – «МУДОР» – ӝукез вӧсян;

10.30-11.00 – делегациослэн «Тӧршор» сцена дортӥ сиё-дано ортчонзы;

11.00-12.00 – «ТӦРШОР» – шулдыръяськонэз валтӥсь сцена вылын сиё-дано усьтон;

12.15-15.00 – «КУНОКУА» – сиськондыр;

12.15-16.00 – «ОШМЕС ГУР» – Удмурт Элькунысь но мукет улосъёсысь коллективъёслэн кырӟан-эктонъёссы;

– «ПИЧИ ГЕРБЕР» – нылпиослы шудонъёс;

– «ГЕРБЕР ШУДОНЪЁС» – калык ӵошатсконъёс, шудонъёс, вожвылъяськонъёс;

– «ШУЛДЫР ШУЛАН ДЫР» – удмурт калыклэсь пелляса шудон крезьгуро инструментъёссэ лэсьтонъя мастер-классъёс, пелляса шудон калык инструментъёсын концерт;

12.15-13.30 – «ТЭТЧАННИ» – калык эктонъёслы дышетонъя мастер-классъёс;

13.30-16.00 – «ВЫЛЬ КЕНЪЁС» – ёросъёсысь но мукет улосъёсысь лыктэм выль кенъёслэн вожвылъяськонзы;

16.30 – куно келян;

19.00-23.00 – «ШУНДЭКТОН» – позыръяськон.