21-тӥ инвожое Яр ёросысьБиграгуртын (Дизьмино) ортчиз Гербер шулдыръяськон.

Шулдыръяськонэ мылысь-кыдысь Татарстан, Башкортостан, Марий Эл, Тюмень улосъёсысь удмуртъёс пыриськизы. Ваньмыз ог 9 000 адями люкаськиз луд вылэ.

Та арын юмшанлэн валтӥсь темаез семья вал. Сои ник шулдыръяськон бадӟым удмурт сюан выллем радъямын вал.

Праздникез усьтӥзы Удмурт Элькунысь йöскалык политикая минисрлэсь ужзэ быдэсъясь Л.Н. Буранова но «Яр ёрос» муниципал кылдытэтлэн тöроез В.А. Наймушин. Калыкез праздникен ӟечкыламзы бере, Виктор Аркадьевич Наймушин Герберлэсь пуссэ, Кылдысинэз, «Кез ёрос» муниципал кылдытэтлэн тӧроезлы сётӥз. Озьыен, 2015-тӥ арын Гербер ортчоз Кезын.

Озьы ик калыкез ӟечкылазы Удмурт Элькун Тӧролэсь ужзэ быдэсъясь Александр Васильевич Соловьев, Удмурт Элькунысь Кун Кенешлэн Тöроез Владимир Петрович Невоструев, Вань удмуртъёслэн «Удмурт Кенеш» ассоциацизылэн президентэз Игорь Николаевич Семёнов, Њуч лулчеберетъя мерлыко огазеяськонлэн кивалтӥсез Сергей Самонович Фефилов.

Гербер тулыс музъем ужъёсты йылпумъялы сӥземын бере, Удмурт Элькун Тöролэсь ужзэ быдэсъясь Александр Васильевич Соловьев но Удмурт Элькунысь гурт возёсъя министрлэсь ужзэ быдэсъясь Алексей Владимирович Стрелков та удысысь азьветлӥсьёсты ӟеч ужамзы понна таукаронэн но коньдонэн пусйизы.

Бӧрысь куноос учкыны быгатӥзы выль семьялэсь кылдэмзэ. Куинь егит кузпалъёс та нуналэ кузпал луэмзы сярысь свидетельсво басьтӥзы.

Праздникез азланьтӥз ӝук сиён. Вашкала сям-йылолъёсты чакласа, вöсяськисьёс Инмарлы тау карон кылъёсын вазиськизы. Вöсям ӝукез котькин веръяны быгатӥз.

Нош кыӵе юмшан шудон-серектонэк?! Куноослэн луонлыксы вал ас мылкыд каремзыя пöртэм площадкаослэн ужазы пыриськыны.

Озьы «Быдэвуон» площадкаын эскеризы егитъёслэсь улонлы дась луэмзэс. Нылъёс но пиос возьматӥзы асьсэлэсь кужымзэс но визьзэс.

«Гербер шудонъёс» площадкаын ортчись вожвылъяськонъёсын эскеризы кужымзэс, шаплы луэмзэс. Татын ик радъяськиз кужымез эскеронъёсъя «Батыр-шоу». Батыръёс юбо ӝутказы, УАЗ машинаез кысказы, песокен мешокез ӝутказы. «Кыктоос» площадкаын кыктоос возьматӥзы асьсэлэсь быгатонлыкъёссэс.

Площакаослэн ужзы йылпумъяськем бере, шулдыръяськонэз азьланьтӥз «Шундэктон» площадка. Туала удмурт кырӟанъёсъя позыръяськон кыстӥськиз уйшорозь. Праздник йылпумъяськиз синмальдытӥсь фейерверкен.

Удмурт Элькунысь йӧскалык политикая министерство нимысьтыз тау каре спонсоръёслы, Яр ёрослы. Соостэк та шулдыр праздник öй ортчысал.