15-тӥ инвожое Шаркан ёросысь Быгы гурт вӧзын – финн-угор дуннеысь лулчеберетъя 1-тӥ шоркарын – улоскуспо «Гербер» удмурт калык шулдыръяськон ортчиз. Удмуртъёс понна со одӥгез тужгес но валтӥсь праздник луэ, кудӥз тулыс бусы ужъёсты йылпумъянэн герӟаськемын. Ужрадэ 17 сюрслэсь трос адями пыриськиз.

УЭ Кивалтэтлэн Тӧроезлэн Нырысетӥ воштӥсез Ольга Абрамова Удмуртиысь улӥсьёсты но куноосты ӟечкылаз:

«Туннэ ми тау кариськом тыршись калыкмылы, музъем гырисьёслы, гурт возёс удысысь ужасьёслы но ваньзылы, кин элькунмес узырмытэ. Инкуазь котькуд ар выль эскеронъёс вае асьмелы, нош ми ваньмы ӵошен вань шуг-секытъёсты вормиськомы. Мон оскисько, туэ арын ӟеч ю-нянь но емыш луоз!» – вераз со.

Кивалтэтлэн Тӧроезлэн Нырысетӥ воштӥсезлэн верамезъя, элькунын ю-нянез кизем площадь оглом 360 сюрслэсь трос гектар луэ. Туэ арын трос мускытэз, соин ик оскон кылдэ, 700 сюрс тонналэсь ӧжыт ю-нянь уз луы шуыса. Шаркан ёрос ю-нянез кизёнъя ӟечъёсыз пӧлы пыре. Озьы ик азьмынӥсьёсыз пӧлын Алнаш но Можга ёросъёс.

Шулдыръяськонэз ортчытӥсь Быгы гуртын Вуоно Вакытысь гурт (Деревня будущего) кылдытӥське. Бадӟым юрттэт отчы «Восход» гурт возёс сётэ, соин Удмурт Элькунлэн Почётной кунмуртэз Анатолий Хохряков кивалтэ. Та гурт возёс элькунысь 10 тужгес но устоосыз пӧлы пыре.

Гуртэтӥ сюресъёс асфальтэн шобыртэмын. Школаын кык агроклассъёс усьтэмын, нылпи сад но фельдшер-акушер пункт тупатъямын. Воркаут-площадка кылдытэмын, кудӥз ноку буш уг луы. Озьы ик трос калыкен ортчись ужрадъёсты радъян понна инфрасӧзнэт умоятэмын: стадионын но «Быг-Быг» площадкаын липетъёс лэсьтэмын. «Единая Россия» партилэн «Культура малой родины» программаезъя клубын тупатъян ужъёс мыно. Черк пуктӥське – борддоръёсыз но куполэз лэсьтэмын ни, пушласянь ужъёс кылемын на. Улӥсьёс коньдон люканэ мыло-кыдо пырисько, ар куспын сюрес инфрасӧзнтэз азинтонэ 3 миллион манет бичазы.

Таяз арын Герберлэн валтӥсь тодметэз – гур. Удмуртъёслэн осконъёсазы гур бадӟым инты басьтэ. Гур коркаез шунтэ, адямиез сюдэ, котыраз быдэс семьяез люканы быгатэ. Соин ик туэ Гербер ортчиз «Шулдыр! Шуныт! Ческыт!» девиз улсын.

Кышет – вань делегациосын кылдытэм Герберысь арт-объект. Куноос пӧртэм удмурт кышетъёсты одӥг интыын адӟизы. Шаркан ёрослэн брендъёсыз шулдыръяськонлэн висъянтэм люкетъёсыз луизы. Та ёрос Удмуртилэн одӥгез валтӥсез ас бордаз кыскись маке, малы ке шуоно татын Тол Бабай улэ.

Тужгес но яркыт спорт площадка радъямын вал – лымшор но уйпал удмуртъёс куспын ортчиз «БОНЫ vs. БЕНЫ» футболъя ӵошатскон. Командаослэн нимъёссы удмурт кыллэн диалектъёсыныз герӟаськемын. Уйпал удмуртъёс ӟуч «да» кылэз «бен» шуо, нош лымшор удмуртъёс – «бон».

2024-тӥ ар Президентэн Семьялэн ареныз юнматэмын. Соин сэрен Удмуртиысь нимлыко (официальной) делегациосысь кузпалъёс вискын радъямын вал тунсыко вожвылъяськон – «Кутэзлы каб». Параос доразы дасям визитказэс адӟытӥзы, кудаз мадизы асьсэ яратонзы но ёроссылэн яке карзылэн историзы сярысь, воргоронъёс кужымзэс но быгатонлыксэс возьматӥзы, нош нылкышноос – кибашлы луэмзэс но пӧраськон удысын быгатонлыкъёссэс.

Со сяна, Гербер вакытэ ик дасэтӥез «ЭРУ» элькун шулдыръяськон ортчиз. Ужрадэ пыриськизы Удмурт Элькунлэн вань ёросъёсысьтыз, озьы ик бускель улосъёсысь егитъёс. Соос бадӟым луэмзэс возьматӥзы: егитъёс черсӥськизы, табань пыжизы, пу пильылӥзы, Удмуртилэн но солэн калыкезлэн историяз «муромылӥзы».

Озьы ик «Гербер» улсын вашкала удмурт эктонъёсты возьматӥсь нылпи дэменлыкъёслы «Быгыртон» гала-концерт ортчиз.

Шулдыръяськон Вань удмуртъёслэн «Удмурт кенеш» мерлыко огазеяськонзылэн кичӧлтэменыз радъяське Удмурт Элькунысь Кивалтэтлэн юрттэменыз. Вуоно арын Гербер Якшур-Бӧдья ёросын ортчоз.