25-тӥ инвожое Сюмси ёросысь Пабья гурт котырын Гербер шулдыръяськон ортчиз.

Удмуртиын Гербер элькун шулдыръяськон чотын 1992-тӥ арысен радъяське. Солэн валтӥсь ужпумъёсыз – удмурт калыклэсь аспӧртэмлыксэ утён, каръёс но ёросъёс вискын кусыпъёссэс юнматон но палэнын улӥсь удмуртъёсын вачеужанэз азинтон .

Соин ик элькунмылэн вань ёросъёсысьтыз, Мускоысь, Санкт-Петербургысь, Татарстанысь, Башкортостанысь, Марий-Элысь, Ханты-Мансийск, Киров но Свердловск улосъёсысь делегациос вуизы.

Ужрадэ пыриськизы Удмурт Элькунлэн Тӧроез А.В. Соловьев, Удмурт Элькунысь Кун Кенешлэн Тӧроез В.П. Невоструев, Удмурт Элькунысь йӧскалык политикая министр Л.Н. Буранова, Историяя, кылъя но литературая удмурт институлэн кивалтӥсез А.Е. Загребин.

Герберын, котьку сямен, ю-нянь будэтӥсьёсты данъязы. Элькунмылэн Тӧроез А.В. Соловьёв тау кариз музъем бордын ужасьёслы. Нош йӧскалык политикая министр Л.Н. Буранова пусйиз шулдыръяськонлэсь калыкъёсты огазеяны быгатӥсь кужымзэ. Угось кемаласен ини Гербере удмурт калыклэсь кырӟам-эктэмзэ учкыны, соин ӵош шумпотыны пӧртэм выжыысь калыкъёс люкасько.

Нялтас вераса, вуоно арын 25-тӥез Гербер Можга ёросын ортчоз. Пумиськытозь!