Кез палъёслэн таӵе веранзы вань: кемалась дыре куазь туж кӧс луэм, соку калык юрттэт курыса Кам-Батырлы вазиськем. Батыр кылзэм калыкез но юрттэм соослы. Выженыз писпуэз ожалтэм, собере соин музъемез кырем. Туж вӧсь луэм Музъемлы. Синкылиосыз солэн возьёс но лудъёс кузя бызиллям. Озьы кылдэм Кам шур.

Кам шур кутске Кез ёросын. 20-тӥ инвожое та музъем пумитаз Герберез, элькун калык шулдыръяськонэз. Югуртлэн ӵыдонтэм возь вылаз Удмуртиысь, Пермь, Татарстан, Башкортостан, Ханты-Мансийск но мукет улосъёсысь куноос вуизы.

Котьку сямен ик татын сӥлы каризы музъем ужасьёсыз. Калык шумпотыса пумитаз ю-нянь будэтӥсьёссэ. Шулдыръяськонлэн программаез паськыт вал: эктыны, куиськыны, шулан лэсьтыны дышетӥсь мастер-классъёс, нылпиослы но арлыдоослы вожвылъяськон-ӵошатсконъёс, шудон-серектонъёс, вӧсям жук, мотоблокен ӵошатскон. Вуонояз аре Герберез Сюмси ёрос пумиталоз.