Гербер шулдыръяськон (0+) – удмуртъёслэн вашкала сям-йылолзы, кудӥз тулыс бусы ужъёсты йылпумъянэн герӟаськемын. Туннэ нуналъёсы та тужгес бадӟым но кема возьмам нунал. Со быдэсак возьматэ удмурт калыклэсь лулчеберетсэ но сям-йылолъёссэ. Таяз аре удмурт йӧскалык шулдыръяськон 21-тӥ инвожое Якшур-Бӧдья ёросысь Кекоран черкогурт котырын ортчоз! Шулдыръяськонлэн сӥё-дано усьтонэз 11:00 часын кутскоз.

Герберлэн валтӥсь тодметэз луоз удмурт пужы. Якшур-Бӧдья ёросын паськыт вӧлмемын «вприкреп» пужыятон амал. Али но со эскериське но улонэ вӧлме. Таӵе амалэн кылдэм арбериос «бӧдья позумент» нимасько, со ёрослэн адӟымон карем ӵектосэз луэ.

Удмурт пужы – аспӧртэмлыко суред, кудӥз удмурт калыклэсь лулчеберетсэ но сям-йылолъёссэ шарая. Солэн тодметъёсыз – лякыт пусъёс, кылсярысь, котретъёс, гожъёс но треугольникъёс. Та черодъяськись пужы адямиослы удмурт лулчеберетэ муромыны юрттэ.

Шулдыръяськонын ПУЖЫЛЫК дунне кылдытэмын луоз – удмурт пужыослэсь кизилисузьет дунне.

Герберын пӧртэм азбаръёс ужалозы: «Куно пумитан», «Вӧсян», «Куно азбар». Лымшор но уйпал удмуртъёс куспын ортчоз «БОН vs. БЕН» футболъя ӵошатскон. Озьы ик ужрадын выльёсыз но луозы.

«Куэм выжлёгет» акция – куноос сьӧразы выжлёгет ваёзы, собере адӟытон кылдытэмын луоз. Радъясьёс пусъё, выжлёгет котькуд ёрослэсь аслэсьтыз аспӧртэмлыксэ возьматыны кулэ. Пӧртэм ёросъёсын соослы гинэ тупась амалъёс, пужыос уже кутӥськыны быгатозы.

Удмурт егитъёслэн «Шунды» огазеяськонзылэн ёрос ёзэтъёсысьтыз огмуртъёссы «Пужыё сюрес» шудон-вожвылъяськонэ пыриськыны быгатозы. Та ужрад удмурт калыклэсь лулчеберетэз, егитъёслы сӥзем ӵектосъёс но ёрослэн адӟымон интыосыз сярысь тросгес тодыны юрттоз.

«Кечат-Вамат» визьбуро шоу-викторинае ёрос но кар командаос пыриськозы.

Ужрадэ пыриськыны ӧтисько элькунысь, бускель ёросъёсысь делегациос, удмурт мерлыко огазеяськонъёсысь вань улосчиос но куноос.

Гербер шулдыръяськонлэн радъясьёсыз – УЭ-ысь йӧскалык политикая министерство, Калыкъёслэн Эшъяськон юртсы, «Удмурт Кенеш» огазеяськон но Якшур-Бӧдья ёрослэн администрациез.