29-тӥ инвожое Санкт-Петербургын Пионер площадьын куинетӥ ползэ «Гербер» удмурт йӧскалык праздник (0+) ортчоз.
Шулдыръяськон тулыс бусы ужъёслэсь йылпумъяськемзэс возьматэ. Та дыре музъем ужен вырись адями, турнан вакыт кутскемлэсь азьло, кӧня ке шокчыны, шутэтскыны быгатэ.

Радъясьёслэн малпамзыя, шулдыръяськон удмурт калыклэсь паймымон лулчеберетсэ но историзэ утьыны но вӧлмытыны юрттоз. Празднике лыктэм куноос калык киужъёсъя но калык эктонъя мастер-классъёсы пыриськыны быгатозы, басма мунё лэсьтыны дышетскозы но трос мукет.

Озьы ик Удмуртилы, солэн инкузезлы но калыклэн улон-вылонэзлы сӥзем туспуктэмъёсын адӟытон ужалоз. Со сяна, Удмурт Элькунысь калык кырӟанъя но эктонъя «Танок» кун ансамбль аслэсьтыз быгатонлыкъёссэ возьматоз. Сцена вылэ Петербургысь учкисьлы тодмо «Невский Италмас» йӧскалык ансамбль но Удмуртиысь сӥё-дано артист Вадим Лозко (жалейка) потозы. Празднике уйпал шоркарысь йӧскалык коллективъёс но пыриськозы – «Кавказ» шоу-группа, чуваш кырӟанъя «Парне» ансамбль, «Горница» фольклор коллектив; калык кырӟанъёсты быдэстоз Юлия Черняковская; «Удмурт дӥськут» нимо этно-дефиле ортчоз.

Ужрадэз ортчытыны юртто Удмурт Элькун Кивалтэт, Санкт-Петербургысь йӧскалык кусыпъёсъя но миграци политикая Комитет, «Санкт-Петербургысь Йӧскалыкъёслэн юртсы», Уйпал-шундыпуксёнпал федерал округысь «Италмас» удмурт землячество, «Вань удмуртъёслэн «Удмурт Кенеш» огазеяськонзы» улосвылкуспо мерлыко огазеяськон.

Тодэ вайытомы, Санкт-Петербургын нырысьсэ «Гербер» 2018-тӥ арын «Озеро долгое» паркын ортчиз. Отчы пыриськисьёс Брангуртысь песянайёслэн творчествоенызы тодматскыны быгатӥзы, кыкетӥ ползэ праздник 2019-тӥ арын Александровской паркын ортчиз. «Гербер» шулдыръяськонлэн вань ужрадъёсыз герӟаськемын удмурт лулчеберетэн но сям-йылолъёсын, ваньмыз со Санкт-Петербургын улӥсь удмуртъёслы но коренной петербужецъёслы туж кельшиз.