Гербер – тулыс музъем ужъёслэн быремзылы сӥзем праздник. Удмуртъёс та нуналэ Инмарлы, Куазьлы но Кылдысинлы тау каризы ужзэс йылпумъяны юртэмзы понна но вазиськизы соослы ӟеч куазь но кужым курыса.

Туала Гербер вашкалалэсь трослы пӧртэм ӧвöл, солэн валтӥсь мугез – музъем бордын тыршисьёсты, агрономъёсты, механизаторъёсты данъян. Нош вӧсяськисьёс, ӵапак вашкала дыре кадь ик, ӝук пӧсьтыса тау карон кылъёсын вазисько Инмарлы, Куазьлы но Кылдысинлы

Та арын юмшанлэн валтӥсь темаез семья луэ. Шулдыръяськон бадӟым сюан выллем ортчоз. Со сяна 2014-тӥ арын 80 арес тырмысал дано удмурт кылбурчилы, Флор Васильевлы. Со вордӥськиз Яр ёросысь Бердыш гуртын. Соин ик солэн творчествоез но шӧдиськоз та праздникын.

Куноосты котькуд арын сямен ик пумиталозы фольклор коллективъёс. Котькуд делегацилы пичи синпелет, шулан, сётозы. Бöрысь та шуланэн куноос вуэмзы сярысь кузёослы ивор сётозы. Праздникез усьтэм бере валтӥсь сцена вылын данъялозы но тау кылъёс вералозы музъем удысысь азьветлӥсьёсты. Та ужрад йылпумъяськем бере куноослэн луонлыксы луоз выль егит семьялэсь кылдэмзэ учкыны. Куинь выль семья кылдоз та нуналэ.

Та вакытэ ик, вашкала сям-йылолъёсты чакласа, вӧсяськисьёс ӝук пӧсьтозы. Кужым сётӥсь вöсям ӝукез верьяны быгатоз котькуд лыкэм адями.

Нош кыӵе шулдыръяськон шудон-серектонтэк ортче? Куноос ас мылкыд каремзыя пыриськыны быгатозы пöртэм площадкаослэн ужазы.

Озьы «Быдэвуон» площадкаын эскерозы егитъёслэсь улонлы дась луэмзэс. Нылъёс но пиос возьматозы асьсэлэсь кужымзэс но визьзэс.

«Гербер шудонъёс» площадкаын ортчись вожвылъяськонъёсы, ӵошатсконъёсы пыриськыны быгатэ котькуд мылкыд карись. Татын ик радъяськоз кужымез эскеронъёсъя «Батыр-шоу». Батыръёс юбо ӝуткалозы, УАЗ машинаез кыскозы, песокен мешокез ӝуткалозы. «Кыктоос» площадкаын кыктоос возьматозы асьсэлэсь быгатонлыкъёссэс.

Площакаослэн ужзы йылпумъяськем бере, шулдыръяськонэз азьланьтоз «Шундэктон» площадка. Туала удмурт кырзанъёсъя позыръяськон кыстӥськоз уйшорозь.

Гербере мыныны-берыны нимысьтыз автобус радъямын луоз. Отчы азьпаласен билет басьтыны луоз таӵе адресъя: Ижкар, М.Горький урам, 68, ТЦ 68, «Дельфин», 2-тӥ этаж, 17-тӥ офис, т. 67-49-67. Кассалэн ужан дырыз: 9-00 – 18-00.

Калык юмшанэз радъяло: Удмурт Элькунысь йӧскалык политикая министерство, «Яр ёрос» муниципал кылдытэт, Удмурт Элькунысь гурт возёсъя но сиён-юонъёсъя министерство, Вань удмуртъёслэн «Удмурт кенеш» огазеяськонзы, Калыкъёслэн эшъяськон юртсы, Чеберлыко киужъёсъя но онеръёсъя центр, Удмурт егитъёслэн «Шунды» мерлыко огазеяськонзы.