Удмурт Элькунысь ӟуч лулчеберетъя огазеяськон куинетӥ арзэ быдэстэ «В кругу друзей» мерлыко ӵектоссэ, кудӥз улсын Ижкарын улӥсьёс ёросъёсын, отысь коллективъёсын тодматско. Та вакчи дыр куспын 20 ёросъёс вуылӥзы ни Ижкаре.

21-тӥ коньывуонэ ӟуч лулчеберетъя «Русский дом» центрын Глаз ёросэн тодматскон ортчиз. Куноос понна радъямын вал: утиськон пусъёс но мунё лэсьтонъя мастер-классъёс, ёросысь кибашлыослэн ужъёсынызы вузкарон-адӟытон, ёрослэн историеныз тодматскон.

Пумиськонэз усьтӥзы Удмурт Элькунысь йӧскалык политикая министрлэн воштӥсез Н.Н. Мамаева, Удмурт Элькунысь лулчеберетъя но туризмъя министрлэн воштӥсез П.П. Данилов, «Удмурт Кенеш» ассоциацилэн кивалтӥсез Т.В. Ишматова, Глаз ёрслэн тӧроезлэн воштӥсез Ю. Ушакова но Удмурт Элькунысь ӟуч лулчеберетъя мерлыко огазеяськонлэн кивалтӥсез В.Э. Тюльпин.

Ужрадэ вуизы ёросын вордӥськем но будэм тодмо но дано адямиос. Соос пӧлын: Удмурт Элькунысь калык артист, Россиысь дано артист, «Айкай» театрлэн валтӥсь солистэз М.Т. Ворончихин; Россиысь писательёслэн огазеяськонзылэн ёзчиез, УдГУ-ысь доцент В.Л. Шибанов; Удмурт Элькунысь устолык удысысь дано ужась В.С. Ушаков.

Та нуналэ сцена вылын кырӟазы-эктӥзы: фольклоръя «Чупчигуръёс» калык ансамбль, «Гармония» вокал ансамбль, эктыны яратисьёслэн «Ветерок» клубзы, экспресс-театр «Весёлые девчата», Р.Байкузин, поэт, композитор, «Элькуновидение» вожвылъяськонлэн финалистэз. А.Леонтьев.