28-тӥ толшоре Глазкарын «Современное состояние и проблемы развития бесермян – коренного малочисленного народа Российской Федерации» нимо семинар ортчиз.

Ужрадэ пыриськизы: Удмурт Элькунысь йӧскалык политикая министр Л.Н. Буранова, Удмур Элькун Кун Кенешысь йӧскалык политикая, мер кышкыттэмлыкъя, ужрадъянъя но регламентъя ӧргилэн кивалтӥсез Э.В. Касимов, Калыкъёслэн Эшъяськон юртсылэн кивалтӥсез Т.П. Боталова, озьы ик элькунысьтымы мукет министерстовоосысь, ужъюртъёсысь ӧнерчиос, мерлыко огазеяськонъёслэн ёзчиоссы.

Семинарез радъяз бесерман калыклэн Удмурт Элькунысь огазеяськонэз.

Семинар ужаз таӵе ӧръёсъя: дышетон но кылэз азинтон, ивор вӧлмытон валтосъёс но этнополитика. Секциосын рос-прос эскеризы бесерман гуртъёсты азинтонэн, нылпи садъёслэсь, школаослэсь, шаертодонъя музейёслэсь но лыдӟетъюртъёслэсь ужзэс радъянэн герӟаськем юанъёсты. Озьы ик нимысьтыз саклык висъямын вал бесерман лулчеберетэз азинтонын каръёсын пумиськись шугсекытъёслы.

Али бесерманъёс Удмуртилэн Юкаменск, Яр, Балезино, Глаз, Красногорск ёросъёсаз уло. Огъя лыдзы кык сюрслэс ятыр. Озьы ке но, бесермман калык туннэ нуналозь утьыны быгатӥз аслэсьтыз паймымон лулчеберетсэ но кылзэ, калык сямъёссэ но йылолъёссэ.

Берло аръёсы лэсьтэм эскеронъёслэн материалысьтызы адӟыны луэ, тросэз ичи лыдъем калыкъёс сямен ик, та калыклэн но лыдыз кеме шуыса. Соин ик кунмы кылкутоно луэ ичи лыдъем калыкъёсты утён понна.

Семинарын пусъемын вал бесерманъёслэсь кылзэс но лулчеберетсэс утён ужрадъёс Удмурт Элькунмылэн «Этносоциальное развитие и гармонизация межэтнических соглашений в 2013-2020 годах» программаяз пыртэмын шуыса. Быдэстэ сое Йоскалык политикая министерство. Программае пыртэм ужрадъёсты пайдалыко быдэстон понна калыклэн юрттэтэз кулэ. Соин ик вераськонын нырысетӥ интые потӥзы мерлыклэсь пӧртэм ужъюртъёсын, тӧрлык ёзэсъёсын кусыпъёссэс эскеронлы но вачеужанзэс радъянлы сӥзем юанъёс.

Семинарез йылпумъяса таӵе пуктонъёс кутэмын вал.

Йоскалык политика министерстволы ӵектэмын юрттыны Удмурт Элькунысь бесерман калыклэн мерлыко огазеяськонэзлэсь ужзэ радъяны, бесерман калыклэн лулчеберетэзлы сӥзем ужъёсты печатланы, бесерман лулчеберетлы сӥзем фестивальёс ортчытъяны но бесерманъёслы улосвылкуспо но калыккуспо ужрадъёсы пыриськыны луонлык кылдытыны.

Удмурт Элькунысь лулчеберетъя но туризмъя министерстволы вазиськизы бесерман колликтивъёслы юрттэт сётыны, ивор вӧлмытон валтоъёслы но туроператоръёслы бесерманъёсын тодматонъя пумиськонъёс, мынон-ветлонъёс радъяны куронэн. Озьы ик бесерман лулчеберетэн тодматонъёс но адӟытонъёс радъяны ӵектэмын вал.

Удмурт Элькунысь дышетонъя но тодосъя министерство азьын бесерман калыклэн лулчеберетэныз но историеныз тодматӥсь дышетон программаос но дышетон пособиос дасяны ужпум пуктэмын. Озьы ик семинарлэн пуктэтаз пусъемын вал бесерманъёслэн улосысьтызы синпелетъёслы мониторинг лэсьтонэн, дунъянлэн но соосты кунэн утён синпелетъёс полы пыртонлэн бадӟым кулэлыкез..

Нимысьтыз саклык висъямын вал ивор вӧлмытон валтосъёслэн бесерман лулчеберетэз утён но волмытон ужын интызылы. Печатья но калыке ивор вӧлмытон агентстволы «Иднакар» газетын нимысьтыз полосе кварталлы одӥг пол бесерман калыклэн улонэз сярысь тунсыко но туалалыко иворъёсты печатланы луонлык утчаны косӥзы.

Нош мерлыко огазеяськонлэн ёзчиосызлы проектъёс кылдытон но соосты быдэстон борды мыло-кыдо басьтӥськыны дэмлазы.