Глазкарын удмурт лулчеберетлы сӥзем нуналъёс кутскозы

2016-тӥ арын 5-тӥ тулыспалэ лулчеберетъя но спортъя «Победа» центрын удмурт лулчеберетлы сӥзем нуналъёсты кутскись ужрад ортчоз.

Концертэ пыриськозы ёросысь но карысь коллективъёс. Фойеын калык понна радъямын луозы «Туала удмуртъёс» адӟытон но ӧнеръёсъя Глазкарысь центрлэн кибашлыосыныз лэсьтэм ужъёсынызы вузкарон-адӟытон.

Тулыспал толэзь ӵоже карын улӥсьёс удмурт артистъёсын но коллективъёсын, суредаськисьёслэн ужъёсынызы, туала гожъяськисьёсын тодматскыны быгатозы. Дышетӥсьёслы но нылпи садын ужасьёслы удумрт кылэз дышетон сярысь нимысьтыз семинар радъямын луоз. Анай кыллэн нуналызы сӥзьысы ортчоз «Анай кылын вераськом» нимо акция. Со сяна радъямын луоз но тодослыко конференци – «Гердлы сӥзем лыдӟонъёс: Кузебай Герд но удмурт калыклэн лулчеберетэз»

Ужрадъясьёс: «Удмурт Кенеш» мерлыко огазеяськонлэн Глазкарысь ёзэсэз, «Калыкъёслэн эшъяськон юртсы » МКВ ЛУ.