«ГОРДОСТЬ НАЦИИ – 2023» Россиякуспо мерлык премилэн радъян комитетэз заявка келянэз кемалыгес кариз – 20-тӥ куарусёнозь. Премиез утонэ пыриськыны быгато соос но, кин ас ужкагазъёссэ азьло аръёсы сётъялляз ни вал, озьы берпуметӥ вебинарын валэктӥзы.

«Кулэ ӧвӧл малпаны, луонлыкез огпол гинэ уже кутыны луэ шуыса. Адямиосты но огазеяськонъёсты, кудъёсыз заявкаоссэс азьло аръёсы келяллязы, куриськомы возьдаськытэк выльысь ыстыны», – ивортӥз Россилэн Президентэзлэн Кивалтонысьтыз йӧскалык политикая департаментлэн кивалтӥсез Татьяна Вагина. «Граждан огазеяськон но калыкъёслэн тупаса улонзы удысъёсын яркыт азинсконъёс понна» номинациын экспертной ӧрилэн тӧроез, но озьы ик Россия Федерациысь йӧскалык кусыпъёсъя кенешлэн ёзчиез Владимир Зорин вылӥ дунъяз заявкаосты дасяны быгатэмез, кудъёсыз эскеронэ вуизы ини. Со верамъя, та номинациын лыдэ басьтӥськоз кандидатлэн калыкез ас сьӧраз валтыны, конфликт югдуръёсты быдтыны тыршемез но быгатэмез.

«Кун йӧскалык политикаысь ивортодэт удысын бадӟым уж нуэмез понна» номинациын экспертной ӧрилэн тӧроез но калык кусыпъёсъя журналистикалэн гильдиезлэн тӧроез Маргарита Лянге вераз, кыӵеоссэ ӵектэммуртъёсты тужгес но дунъяло комитетлэн ёзчиосыз. Со сыӵе кандидатъёс, кудъёсыз ас котыразы трос кылзӥськисьёсты люканы быгато, СМИ но вотэс-ресурсъёсты уже кутыса.

«Ми тужгес ик возьмаськом журналъёсты, дайджестъёсты, кудъёссэ Калык Эшъяськон юртъёс потто, нимысьтыз ортчем дырлы йылпумъянъёс лэсьтылыкузы. Эн возьдаське азинскон-вормонъёстылэсь, ми соосты туж возьмаськомы но ӟеч мылкыдын эскеромы», – юнматӥз на Маргарита Лянге.

«Йӧскалык кусыпъёсъя удысысь тужгес но ӟеч практикаос но ӵектосъёс понна» номинациын экспертной ӧрилэн тӧроез но йӧскалык кусыпъёсъя Ресурсной центрлэн директорез Евгения Михалева валэктыны куриз, пыриськисьёс ӵектоссылэсь тужгес но аспӧртэмлыко палзэ мед усьтозы шуыса.

Москваын вуоно лауреатъёсты данъетан церемонилы дасясько ини. Сӥё-дано ужрад сяна, пыриськисьёсты дышетон люкет но возьма, кудаз пумиськонъёс ортчозы Йӧскалык ужъёсъя федерал агенствоысь, Россиысь калыкъёслэн Ассамблеяысьтызы кивалтӥсьёсын, чакламын Мерлыко палатае но Кун Думае ветлон.

Пыриськиськыны быгато:

– мерлык но коммерциен герӟаськымтэ огазеяськонъёсысь огмуртъёс, кудъёсыз йӧскалык политика удысысь ӵектосъёсты улонэ пыӵато;

– асмылкыдчи движениосысь огмуртъёс;

– анай кылъёсты нуись дышетӥсьёс, кылъя азьветлӥсьёс, анай кылэз утёнъя но азинтонъя ӵектосъёслэн авторъёссы;

– журналистъёс но блогеръёс;

– калык творчествоя усточиос но этнобизнесэз радъясьёс (этнотуризм, этномода но мукет);

– творческой коллективъёслэн, огазеяськонъёслэн кивалтӥсьёссы но пыриськисьёссы.

Премия Россиысь калыкъёслэсь огъя луэмзэс юнматон но этнокультурной азинсконлы бадӟым пайда ваем понна арлы быдэ сётӥське. Лауреатъёсты данъетан церемония Россиысь калыкъёслэн огазеяськон Нуналазы, 4-тӥ шуркынмонэ, вадьсатэмын луоз. Таяз арын вормисьёсты огдышем сямен ортчись 7 номинациосъя тодозы, ватсалозы на эшшо одӥг выль номинация, кудӥз нимаське «Атыкай Утисьёс», со сӥземын нимысьтыз ожгаре пыриськисьёслы.

Куинь аръем премилэн историяз Россиысь 45 улосвылъёсысьтыз 88 адями данъямын ини. Премиез ортчыто Россиысь калыкъёслэн Ассамблеязы калык кусыпъёсъя журналистикалэн гильдиезлэн, йӧскалыккуспо кусыпъёсты возёнъя Россиысь Президентлэн Кенешезлэн, Йӧскалык ужъёсъя федерал агенстволэн, Кун Думалэн, Москваысь йӧскалык политикая но улосвыл кусыпъёсъя Департаментлэн, Россия Федерациысь мерлык палаталэн но В.Д. Поленов нимо Калык творчествоя кун юртлэн юрттэменызы.

Вожвылъяськонэн пыр-почгес тодматскыны: https://gordostnation.ru/