Центрез усьтон ужрадэ пыриськизы Удмурт Элькунысь йöскалык политикая министрлэн воштӥсез Л.Ю. Соковикова, Калыкъёслэн Эшъяськон юртсылэн кивалтӥсез Т.П. Боталова, Грак ёрослэн тöроез М.А. Крестьянинов но мерлыко огазеяськонъёслэн ёзчиоссы.

Ужрад котырес ӝӧк форматэн ортчиз. Валтӥсь темаез – йӧскалы лулчеберетъёсъя центрлэн ёросысь мерлыко огазеяськонъёслэн ужазы кулэлыкез.

Куноосты пумитазы вить кышномуртъёс, ӟечбуръяськизы соос вить кылын: удмурт, ӟуч, кряшен, пор, чуваш – угось ӵапак та калыкъёс тупаса уло ёросын. Ужез азинтӥз Грак ёрос администрацилэн кивалтӥсезлэн воштӥсез – В.М. Савина. Валентина Михайловна вераз, кызьы ёросын йӧскалык политика быдэстӥське. Мерлыко огазеяськонъёслэн кивалтӥсьёссы веразы асьсэлэн ужъёссы, шуг-секытъёссы сярысь.Сюлмаськытэ соосыз калыклэн анай кылзэ вунэтэмез, куд ог ужрадъёсты ортчытыны коньдон луымтэ. Таӵе центрлэн кылдэмез шумпоттытэ, угось татын ӵошен ужаны выль луонлыкъёс усьтӥсько.