14-тӥ инвожое Татарстанысь Бавлы ёросысь Покровcкий Урустамак черкогуртын «Гырон быдтон» праздник ортчиз.

Туж шулдыр интыын, тымет дурын, дасямын нимысьтыз сцена, кыдёкын ик öвöл кибашлыослэн ужъёсынызы лавкаос интыямын, палэнынгес тылскемъёс ӝуало, отын ӝук пӧсьтӥзы. Но, куазь зол зорыны кускемен праздникез лулчеберетъя юртын ортчытоно луиз. Гурт калык куазь зорез кема витиз ни вал, соин ик зорлы шумпотӥзы.

Калыкез тулыс музъем ужъёсыз быдтэменызы ӟечкыланы но шулдыртыны Агрыз, Бавлы, Балтаси, Мамадыш, Менделеевск, Кукмор ёросъёсысь, Елабуга, Набережные Челны каръёсысь но Башкир улосысь – «Зангари» фольклор ансамбль но Удмурт Элькунысь «Айкай» коллекивъёс лыктӥзы.

Празднике вуизы бадӟым куноос: Бавлы ёрослэн Тӧроез, Бавлы карлэн йырыз Хабибуллин А.Г, Удмурт Элькунысь лулчеберетъя, печатья но ивортодэтъя министрлэн воштӥсез Данилов П. П., Татарстанысь калыкъёслэн ассамблеязылэ кивалтӥсезлэн воштӥсез Н.М.Владимиров, Татарстан Республикаысь дышетонъя но тодосъяз министрлэн воштӥсез С.В.Гиниатуллина.

Шулдыръяськонын пöртэм пумо вожвылъяськонъёс, шудон-серектонъёс ортчизы.

«Айкай кизили – удмуртская красавица» вожвылъяськонэ Балтаси, Бавлы, Кукмор, Мамадыш ёросъёсысь, Елабуга но Набережные Челны каръёсысь нылъёс .пыриськизы.

I инты басьтӥз – Наталия Михайлова – Кукмор ёросысь Починок Сутер гурт.

II инты- Маргарита Геккель – Бавлы ёросысь Покровский Урустамак черкогурт.

III инты – Юлия Параманова – Балтаси ёросысь Малые Лызи гурт.

Праздник йылпумъяськиз. Куазь зор ӧз люкеты калыклы шутэтскыны, шулдыръяськыны, пумиськонлы шумпотыны. Кенешен кутэмын вал вуоно арын Гырон быдтонэз та интыын ик ортчытыны.