25-26-тӥ шуркынмонэ Россиын улӥсь ичи лыдъем выжы калыкъёслэн егитъёссы элькунамы вуозы. Таӵе ужрад Удмуртиын нырысьсэ радъяське. Бесермян, ханты, челкан, долган, ненец, эвенек, саам, шорц, абазин, нагайбак калыкъёслэн егитъёссы веразы ини форуме пыриськемзы сярысь.

Форумлэн валтӥсь малпанэз – ичи лыдъем выжы калыкъёслэсь кылзэс дышетонлы, утёнлы но азинтонлы сӥзем ужрадъёсы егитъёсты кыскон, та удысын пумиськись шуг-секытъёсты сэрттыны-пертчыны площадка кылдытон.

Егитъёс понна дасямын узыр пуштросо программа: ичи лыдъем выжы калыкъёс сярысь экспертъёсын кенешон, кылэз утён но азинтон удысысь тужгес азинлыко ӵектосъёсты эскерон, выль ӵектосъёсын тодматскон. Калыкъёслэн Эшъяськон юртсылэн фойеяз «Бесерманъёслэн, Удмуртиысь ичи лыдъем выжы калыклэн, улон радзы но лулчеберетсы» адӟытон ужалоз.

Озьы ик егитъёс Юкаменск ёросэ вуылозы. Татын соос ёросысь школаоысын дышетскисьёс понна ичи лыдъем выжы калыкъёслэн лулчеберетэнызы но сям-йылолъёсынызы тодматон урок ортчытозы. Шамардан черкогуртысь бесерман лулчеберетъя центрын бесерман калыклэн мерлыко огазеяськонэныз, фольклор коллективъёсын тодматскон радъямын луоз.