Конфессикуспо спартакиада улсын северной амалэн ветлонъя ӵошатсконъёс йылпумъяськизы.

10-тӥ куарусёнэ III Конфессикуспо спартакиада улсын северной амалэн ветлонъя ӵошатсконъёс ортчизы.

Ужрадэз радъясьёс: Ижкар епархия, Удмуртиысь мусульманъёслэн улосвыл духовной кивалтоннизы, Удмурт Элькунысь мугор лулчеберетъя но спортъя министерство но Йӧскалык политикая министерство.

Ӵошатскон Ижкарысь оружейник Драгунов нимо скверын ортчиз. Ужрадэ Ижкар, Сарапул кар но Кудымкар епархиосысь, Удмуртиысь мусульманъёслэн улосвыл духовной кивалтонниысьтызы но Ижкар Покров старообрядчество приходысь 300-лэсь трос спортэн тунсыкъяськисьёс пыриськизы.

Ӵошатсконлэн партнёръёсыз: «Удмуртиысь туристъёслэн огазеяськонзы. Спорт туризмъя федерация» Удмурт Элькунысь нылпи но егит мерлыко огазеяськон (кивалтӥсез Наталья Радионова) но «СпортПаркСемья-Тумаев» физкультурной но тазамытонъя центр (кивалтӥсез Владимир Тумаев).

Ужрадэз усьтонын бызьылӥсьёсты Ижкар но Удмурт Элькунысь митрополит Викторин, Удмурт Элькунысь муфтий Фаиз хазрат Мухаметшин, йӧскалык политикая министр Эдуард Петров, Удмурт Элькунысь мугор лулчеберетъя но спортъя министерствоысь кивалтӥсьлэн воштӥсез Дмитрий Аркалов, футболэн шудӥсь, «Союз-Газпром» нимо Ижкарысь футбольной клуб кылдытӥсь Владимир Тумаев но Удмурт Элькунысь северной амалэн ветлонъя азьмуртэз Григорий Ушаков ӟечкылазы.

Ӵошатскон азьын семьяослы сӥзем спорт праздник ортчиз – 600 метр дистанцие вань мылкыд карисьёс потӥзы, арлыдзэс но ортчем дырзэс лыдэ басьтытэк.

Собере арлыдэз возьматӥсь вить категориосъя ветлонъя ӵошатскон ортчиз.