3-тӥ толсуре бигер егитъёслэн «Иман» мерлыко огазеяськонзылэн ёзчиосыз Калыкъёслэн Эшъяськон юртазы огазеяськонлэн ужезлы йылпумъянъёс лэсьтыны но выль кивалтӥсь бырйыны люкаськылӥзы.

Йылпумъян-быръён конференция ортчытӥське кык арлы одӥг пол. Люкаськем егитъёслы сӥзёнъёсын вазиськизы Удмуртиысь бигеръёслэн йӧскалык автономизылэн кивалтӥсез Рамзия Габбасова, Ижкарысь мерлыко палаталэн кивалтӥсез Людмила Гуляшинова, Йӧскалык политикая министерствоысь ӧнерчи Алёна Наговицына.

Огазеяськонлэн кивалтӥсез Гульфия Ахтямова ужезлы йылпумъянъёс лэсьтӥз . Та дыр куспын «Иман» ортчытӥз трос пӧртэм ужрадъёс но акциос, соос пӧлын – бигер чеберинаез быръёнъя «Татар кызы» вожвылъяськон, бигер кылэз дышетонлы сӥзем «Мин татарча сөйләшәм» акция, «Татарский диктант» акция но мукет. Г. Ахтямовалэн верамезъя, та дырлы огазеяськонын кылдӥз команда, кудӥз бигер кылэз но лулчеберетэз утён но вӧлмытон бордын тыршыса ужаны дась.

Огазеяськонлэн коньдон ужпумъёсыз сярысь ивортон лэсьтӥз Лейла Шаймухаметова. Ёросъёсысь ёзэтъёслэн ужзы сярысь мадизы Можгаысь Айдар Низамбиев но Сарапулысь Рустам Сулейманов.

Курултайлэн быръён люкетаз пыриськизы кык егит нылъёс – Назлыгуль Насирова, Ижкарысь медакадемиын дышетскись, но Гузалия Кашапова, огазеяськонлэн кивалтэтэзлэн ёзчиез. Котькудӥз вераз аслаз учконъёсыз но меретъёсыз сярысь, кудзэ быдэстыны тыршоз кивалтӥсь луиз ке.

Назлыгуль Насирова пусйиз огазеяськонлэсь бигер огазеяськонъёсын но мукет выжы калыкъёслэн огазеяськонъёсынызы кусыпсэ юнматонлэн кулэлыкез сярысь. Гузалия Кашапова саклык висъяны ӵектӥз егитъёслэсь шуштскон дырзэс радъянлы, мырлыклы кулэ луись ужъёсты ӵошен быдэстонлы, бигер кылын театральной постановкаос лэсьтонлы.

Быръёнъёсын тросгез куара люказ Гузалия Кашапова, соин вуоно кык ар ӵоже со кивалтоз огазеяськонэн. Калыкъёслэн Эшъяськон юртысьтызы методист Лариса Гайнутдинова ужъюртлэн но мерлыко огазеяськонлэн пайдалыко но азинлыко ужзылы осконзэ вераз.